Keshe Reseı prezıdenti Vladımır Pýtın halyqqa úndeý jasap, qıyn sátte ózine qoldaý kórsetken halyqqa alǵys bildirdi. Al áskerı búlikti uıymdastyrýshylar "memleketine, halqyna ǵana emes, ózine ergen adamdardy da satyp ketkenin" sóz etti. Alaıda sarapshylar Evgenıı Prıgojınniń búligi Pýtınniń bedeline orasan zor zııanyn tıgizgenin aıtady.
Evgenıı Prıgojınniń «Vagner» áskerı uıymynyń áreketi álem jurtshylyǵynyń nazaryn aýdartty. 1 mıllıonnan astam halqy bar Dondaǵy Rostov qalasyn áp-sátte basyp alyp, Máskeýge “Ádilet” sherýi” atalǵan joryqqa shyqqan áskerı uıym Reseı astanasy túbinen keri qaıtty. Osy oqıǵa Pýtınniń el ishindegi jáne halyqaralyq bedeline qalaı áser etedi?
«PRIGOJIN JEKE-DARA ÁREKET ETTI»
Saıasattanýshy, Dos Kóshimniń aıtýynsha, Prıgojınniń áreketi Pýtınniń bedeliniń túsýine áser etti. Sondaı-aq ol Prıgojınnyń áskerı búlikti jeke-dara óz uıymdastyrǵanyn eskertti.
- Qazaqta «Hannyń eki sóılegeni ólgeni» degen sóz bar. Pýtın áýeli «satqyn, artymyzdan pyshaq urdy» dep aıyptady. Keıin ony jazalamaıtyn bolyp, Belarýsqa jiberýge kelisýi Pýtınniń álsiregenin kórsetedi. Pýtınnen mundaı sheshimdi óz basym kútken joqpyn. Ózine qarsy áskerı búlik bastaǵan adamdy birese, «jazalaımyz», birese «jazalamaımyz» degen soń Pýtınde ne abyroı qaldy?!.- deıdi Dos Kóshim.
- Meniń oıymsha, Pýtın ózge adamdar aıaq tartyp júrýi úshin Prıgojındi mindetti túrde jazalaýy kerek edi, - deıdi saıasattanýshy.
Aıtýynsha, bılik Pýtındi birbetkeı, qaısar adam etip kórsetkisi kelse, Prıgojın men «Vagnerdiń» joǵary shendi azamattaryn bári bir jazalaıdy.
- Sondyqtan da men Prıgojınniń ornynda bolsam, Belorýssııada turaqtamas edim. Keıbir sarapshylar Prıgojınniń artynda qandaı da bir yqpaldy top boldy degendi aıtady. Meniń oıymsha, ol ózi jeke-dara áreket etti. Óıtkeni ol buǵan deıin qarsylyǵyn kórsetip keldi. Biraq Prıgojındy qoldaıtyn toptardyń bar ekenin joqqa shyǵarýǵa bolmaıdy. Máskeýdegi joǵary jaqtan bastap halyqtyń arasynda da ony qoldaýshylar bar, - deıdi Dos Kóshim.
– Sebebi Prıgojın áreketiniń sıpaty mynandaı bolyp jatyr. Birinshisi, áskerı baǵyt bolsa, ekinshisi, Pýtınnen de ótken ásireultshyl retinde Reseıdi qorǵaýshy róline endi. Orystyń radıkaldy ýltra-ultshyldary men shovınısteriniń ony qoldaıtynyn kórdik. Demek, ony joǵary jaqta da qoldaıtyndar bar. Biraq olar Prıgojınniń sońǵy áskerı áreketin qoldady dep aıta almaımyz. Keshegi oqıǵa Prıgojınnyń jeke bastamasymen júzege asty, – deıdi saıasattanýshy.
«BURYN PROPAGANDASY ÓTIMDI BOLǴAN RESEI OILANA BASTADY»
Al áskerı sarapshy Ermek Seıitbattalov Proıgojınniń áskerı búligin maıdandaǵy jeńilistermen baılanystyrady. Sebebi soǵys bastalǵan bir jarym jylda Reseı áskeri kóp shyǵynǵa ushyraǵan.
«Reseı úshin soǵysta jetistik bolǵan joq. Bálkim, az da bolsa, Bahmýttyń janynda jeńgendeı bolǵan shyǵar. Onda da áskerden góri Prıgojınniń «Vagner» áskerı uıymy belgili bil deńgeıde jetistikke jetkendeı áser qaldyrdy. Sońǵy kezderi ol Pýtınge jaqpaıtyn málimdeme jasaı bastaǵanda, Kremldegiler «Mynany toqtatý kerek eken» degen sheshim shyǵardy. Óıtkeni buǵan deıin LNR men DNR-diń ár túrli deńgeıdegi adamdary kenetten qaıtys bolyp jatty. Meniń oıymsha, Prıgojın óziniń taǵdyry qalaı aıaqtalatynyn bildi. Óıtkeni 1 shildeden bastap Reseıdegi áskerı uıymdardy Qorǵanys mınıstrligi qol astyna alǵysy keldi. Eger olaı bolsa, Afrıka men Sırııadaǵy barlyq ásker qorǵanys mınıstri Shoıgýdyń qol astyna ketip, Prıgojınnyń ózi dalada qalaıyn dep otyr. Al jalǵyz qalsa, ol qaýip tónetinin bildi», – deıdi ol.
Áskerı sarapshy Máskeýge joryqty Prıgojın ózi bastaǵanyn aıtady. Keıbir sarapshylar aıtqandaı onyń artynda qandaıda bir yqpaldy toptar turǵan joq. Biraq ol bul áskerı sherýdiń Pýtınniń bedeline orasan zor zııanyn tıgizgenin joqqa shyǵarmaıdy.
– Reseıdegi áskerı búlik Pýtınniń bedeline orasan zor zııanyn tıgizdi. Óıtkeni onyń janyndaǵy eń jaqyn dostary otbasylaryn shet elge qashyryp jiberdi. Al Dondaǵy Rostovtyń halqy Prıgojındi qoldap, Kremldi qorqyta bastady. Bir sózben aıtqanda myzǵymas Pýtınniń bıligine qater tóndi. Áý basta ol Prıgojındi «Satqyn, tý syrtymyzdan pyshaq urdy» dep aıyptady ǵoı. Aqyr aıaǵynda ol Prıgojınniń talabyna kónýge májbúr boldy. Rostovtan zyryldap otyryp Máskeýge 200 shaqyrym qalǵan kezde toqtady. Pýtın óziniń jalǵyz qalǵanyn túsindi. Al Prıgojınniń áreketi el arasynda «áskerı tóńkeris jasaýǵa bolady eken» degen túsinik qalyptastyrdy. Buǵan deıin Reseı propagandasy halyqqa ótimdi bolsa, qazir oılana bastady. Óıtkeni áskerı búlik kezinde eldiń kóbi Prıgojındi qoldady, – deıdi áskerı sarapshy Ermek Seıitbattalov.
Serik Joldasbaı
“Adyrna” ulttyq portaly
