Dinı oqytýshy Qabylbek Álipbaıulynyń para berý týraly alty jyl buryn aıtqan ýaǵyzy jelide qyzý talqyǵa tústi, dep jazady "Adyrna" ulttyq portaly.
Vıdeony Facebook jelisinde Naýka Mýkash esimdi qoldanýshy júktedi.
Imamnyń aıtýynsha, sharıǵat boıynsha para berýge bolatyn bir ǵana oryn bar.
"Ózińniń adal eńbegińmen, oqyǵan mamandyǵyń boıynsha jumys istep jatsyń. Biraq basshyń kelip para surap, bermeseń seniń ornyńa basqa bireýdi alamyn dese, bala-shaǵańdy baǵý úshin sol adamǵa para berýińe ruqsat" dedi ol.
Derekterge súıensek, vıdeodaǵy ýaǵyz osydan alty jyl buryn Youtube jelisine júktelgen eken.
Alaıda keıin Qabylbek Álipbaıuly budan ózge ýaǵyzdarynda "para berý qandaı maqsatta bolmasyn durys emes" dep sózin túzegen. Soǵan qaramastan qoǵam nazaryna onyń alty jyl burynǵy vıdeosy aıryqsha iligip, synǵa ushyrap jatyr.
Jeli qoldanýshylary taralǵan vıdeoǵa "jemqorlyqqa shaqyryp otyrǵan bul kisige jaza kerek", "negizi sharıǵatqa qaıshy nárse, bul kisi ne aıtyp otyr", "Kúlemiz be, jylaımyz ba? Ótirikti shyndaı, shyndy dyńdaı qyldy degen osy - aý!" dep jazysty.
