Memleket basshysy Qasym-Jomart Toqaev Q.Qýanyshbaev atyndaǵy Memlekettik akademııalyq qazaq mýzykalyq drama teatrynda sahnalanǵan «Joshy han» spektakliniń premerasyna bardy. Bul týraly Aqorda jarııalady, dep habarlaıdy “Adyrna” ulttyq portaly.
Spektaklde Shyńǵys han men uly Joshy arasyndaǵy qarym-qatynas, olardyń el basqarý isindegi qabyldaǵan sheshimderi, ómiriniń belgili kezeńderi keńinen sýretteledi.
Qoıylymdy tamashalap bolǵannan keıin, Memleket basshysy teatr ujymyna alǵysyn aıtyp, ystyq lebizin bildirdi.
Qutty bolsyn! Óte keremet qoıylym boldy. Shyn máninde, pesanyń taqyryby óte mańyzdy, ózekti. Mundaı týyndylar halqymyz úshin qajet dep oılaımyn. Pesanyń tili, mátini óte jaqsy jazylǵan. Ártisterdiń bári jaqsy oınady. Sheberligi myqty eken. Bizdiń tarıhymyzdy, tarıhı qundylyqtarymyzdy qazirgi tańda halyq arasynda keńirek dáripteýimiz kerek. Keıbireýler qazaqtardyń óz tarıhy, memleketi, eli bolmaǵan degen sózder aıtyp júr. Ol – bizdiń tarıhymyzdy burmalaý. Ónerlerińiz qashanda tabysty bolsyn. Barshańyzǵa amanshylyq tileımin, – dedi Toqaev.
Sondaı-aq, Prezıdent óner ordasyna ulttyq mártebe berdi. Tıisti Jarlyq qazan aıynda Respýblıka kúni qarsańynda jarııalanatyny habarlandy.
Qoıylymda memleket basshysynan bólek, Ashat Aımaǵambetov, Erlan Qarın, Aıda Balaeva, Ashat Oralov, Azamat Satybaldy, prezıdent ákimshiliginiń qyzmetkerleri jáne depýtattar men belgili óner adamdary boldy.
Kóptiń kóńilinen shyqqan tarıhı dramanyń avtory - belgili jazýshy, dramatýrg Dýman Ramazan, qoıýshy rejısseri – Qazaqstannyń eńbek sińirgen qaıratkeri Bolat Uzaqov.
Qoıylymnan keıin tarıhı dramanyń avtory Dýman Ramazan da óz alǵysyn bildirip, jelidegi paraqshasyna jazdy.
“Joshy han” tarıhı dramamyzǵa kelip-kórip, oń baǵasyn bergen Qazaqstan Respýblıkasynyń Prezıdenti Qasym-Jomart Kemeluly Toqaevqa aıtar alǵysym sheksiz!
Prezıdentimimizdiń mádenıetimiz ben ónerimizge, ádebıetimizge kóńil bólip, qoldaý bildirýi biz sekildi óner adamdaryna erekshe qanat bitiredi. Rızashylyǵym da sheksiz!
Astana teatryna ulttyq mártebe berildi. Qutty bolsyn Eńbekterińiz elenip, juldyzdaryńyz jana bersin!,- dedi jazýshy.
