Burynǵy mádenıet jáne sport mınıstri, Ulttyq mýzeıdiń eks-basshysy Arystanbek Muhamedıuly Astana sotynda sońǵy sózin aıtty, dep habarlaıdy «Adyrna» tilshisi.
«Bir jyldan astam qazaqstandyqtar jáne álem «Altyn adam» kórmesine qatysty qylmystyq istiń barysyn baqylap keledi. Bıyl 17 sáýirde sottyń alǵashqy otyrysynda men Memleket basshysynyń jarlyǵyn oryndaý úshin Úndistannan «Altyn adamdy» elge aman-saý alyp kelgenimdi aıttym. Elshilik, basqa da quzyrly organdardyń kómegimen lokdaýnnyń dál aldynda qundy dúnıeni Qazaqstanǵa jetkizdik. Men zań buzǵan joqpyn jáne kinámdi tolyq moıyndamaımyn. Ony buǵan deıin de aıtqanmyn. Sózimniń dáleli - aıyptaý aktisiniń jańa tujyrymy, onda prokýror qarjy jymqyrý, sóz baılasý jáne el zańyn buzý derekterin keltirgen joq. Barlyq shaqyrylǵan kýáger urlyq derekteriniń, tipti aıyptalýshy tarapynan zańsyz áreketter bolmaǵanyn qaıtalady»,—dedi sottalýshy.
Arystanbek Muhamedıuly bıýdjet qarajatyn jymqyrý degen aıyppen múldem kelispeıtinin jetkizdi.
«Qurmetti sýdıa, men kez kelgen jazaǵa kelisemin, tipti atý jazasy bolsyn.. Biraq jymqyrdy degenge emes. Qazaqtyń «Ólimnen uıat kúshti» degen maqaly bar. Men alpys jyl laıyqty ómir súrdim»,—dedi ol.
Eske salaıyq, 2022 jyldyń 29 mamyrynda Arystanbek Muhamedıuly bıýdjet qarajatyn jymqyrdy degen kúdikpen qamaýǵa alyndy.
Antıkor ulttyq mýzeıdiń burynǵy basshysyna «Altyn adamnyń álem mýzeılerine sherýi» halyqaralyq kórmesin ótkizý jónindegi memlekettik satyp alý týraly shart aıasynda 146 mıllıon teńge somasynda bıýdjet qarajatyn jymqyrdy degen aıyp taqty.
