Jetisý jeriniń tabıǵı-klımattyq jaǵdaıy týrızmniń barlyq túrin damytýǵa múmkindik beredi. Osy múmkindikti tıimdi paıdalaný úshin aımaqta ınfraqurylymdy jaqsartý jumystary qarqyndy júrip jatyr. Bul týraly búgin jýrnalısterge arnalǵan brıfıng kezinde Jetisý oblysynyń ákimi Beıbit Isabaev baıandap berdi, - dep habarlaıdy oblys ákiminiń baspasóz qyzmeti.
Óńir basshysynyń aıtýynsha, ótken jyly Úsharal qalasy áýejaıynyń ushý-qoný jolaǵy iske qosyldy, «Taldyqorǵan-Úsharal», «Úsharal-Dostyq» avtomobıl joldarynyń asfaltbeton jabyny tóseldi, bıyl tolyq aıaqtalady. Týrıstik maýsymǵa deıin jol boıynda Qyzylaǵash, Jansúgirov, Kólbaı, Qabanbaı eldi mekenderiniń tusynda ájethana men estakadasy bar demalý alańdary iske qosylady.
- Balqashqa deıingi jol qurylysynyń 70%-y bitedi, kelesi jyly tolyq aıaqtap, jaǵalaýdaǵy ınjenerlik – kommýnıkaııalyq jelilerdiń qurylysyn bastaımyz. Sonyń nátıjesinde barlyq respýblıkalyq mańyzy bar joldardyń sapasy jaqsarady. Kelesi jyly Saryózek-Jarkent jolynyń jóndeý jumystary aıaqtalady, - dedi B.Isabaev.
Odan bólek Tekelide taý týrızmin damytýǵa kóńil bólinip, shańǵy-bıatlon keshenin salýdyń jobalyq-smetalyq qujaty ázirlenýde, «Burqanbulaq» sarqyramasyna deıingi jol qaıta jańartylady. Sol sııaqty Shoqan Ýálıhanov kesenesine deıingi 6,5 shaqyrym jolǵa ortasha jóndeý jumystary tamyzda aıaqtalady, jergilikti bıýdjetten 253 mln. teńge bólindi. «Qazqaıtajańartý» RMK uıymy mýzeı keshenine kúrdeli jóndeýdi bastady.
Jetisý oblysy ákiminiń baspasóz qyzmeti.
