Abaı oblysynda oryn alǵan apat kezinde memlekettik organdardyń jumysyna eriktiler men belsendi azamattar qosyldy, dep habarlaıdy “Adyrna” tilshisi.
“Jumyla kótergen júk jeńil” demekshi Abaıdaǵy laýlaǵan órt aımaǵynda júrgenderge 180-nen astam eriktiler kómek kórsetýge asyq. Tynymsyz eńbek etip jatqan órt sóndirýshilermen birge úsh shtabqa bólingen jergilikti jeli músheleride aýysymmen qoldan keler kómekti aıamaýda.
“Bizdiń taǵdyrymyz bir!” degen Ulttyq volonterlik jelisindegi eriktilerdiń bir bóligi azyq-túlik pen qajetti zattardy satyp alyp, býyp-túıip, tamaq ázirleýmen aınalyssa, avtoeriktiler zattardy tasymaldaıdy. Ormanda júrip-turýǵa ruqsat qaǵazy barlar kúzet pýnktine deıin zattardy jetkizip otyrady.
Atalmysh jeli eki kún ishinde turǵyndardan 14.789.129,63 teńge kóleminde qarajat jınaǵan. Bul aqsha naqty maqsatta, apat aımaǵynda turyp jatqan turǵyndar men órtti sóndirýde qyzmet etip jatqan azamattardyń qajettiligine baǵyttalatyn bolady.
Tek búgin ǵana 400 keli qoı jáne qus etimen, 600 keli kartop, sábiz, pııaz syndy kókónistermen, 100 lıtr ósimdik maıymen turǵyndar qamtamasyz etilgen.
