Semeıdiń ormany órtenip jatyr. Ázirge 60 myń gektar orman órtengen. Eger sóndire almasa, budan da ulǵaıa túseri sózsiz. Tilsiz jaýmen alysam dep 14 adam adam qaza tapty. Imandary salamat bolsyn.
Prezıdent ótkizgen tótenshe jıynda Ekologııa mınıstri jylap turdy.
Bul kóz jas – sharasyzdyqtyń kóz jasy.
Bul kóz jas – bıliktiń jemqor ekenin aıta almaı qystyǵyp, ishten tynǵan jas shendiniiń kóz jasy.
Bul kóz jas – elimizdiń kadr saıasatynyń tyǵyryqqa tirelgeniniń kóz jasy.
Bul kóz jas – asqynǵan bıýrokratııany, sheneýnikterdiń qamsyzdyǵyn, qaıratsyzdyǵyn únsiz aıyptaǵan kóz jas.
Bul kóz jas – paraqor, toq ulyqtardyń arasynda ózin artyq seziný kóz jasy.
Bul kóz jas – órt túgili ómirdi bilmeıtin, el ishinde óspegen, jurttyń muń-muqtajyn bilmeıtin, qarapaıym halyqtan tym alys, jas sheneýniktiń birden mınıstr bolǵanyna ókingen kóz jasy.
Bul kóz jas – ózin mınıstrlikke ómir kórsetpeı, qyzmet baspaldaqtarymen satylap, sonaý tómennen ósirmeı, kásibı turǵydan jetildirmeı, birden mınıstr qoıa salǵan "jebeýshilerine" laǵnet aıtqan kóz jasy.
Bul kóz jas – biliksiz kadrdyń kóz jasy.
Bul kóz jas – sóz júzinde bar "Jańa Qazaqstannyń" is júzinde joq ekenin bildirgen kóz jas...
Bul kóz jasta bári bar: jemqorlyqtyń joıylmaıtyny, el men jerge jany ashymaıtyn jemqor sheneýnikterdiń budan ári de el basqara beretindigi;
Aq Ordanyń ótirik statıstıkamen ómir súretindigi;
Kózboıaýshylyqpen aınalysý – bıliktiń eń súıikti isi ekendigi;
Sheneýniktik korpýstyń eshteńeden sabaq almaıtyndyǵy;
Sheneýnikterdiń memleket múddesi úshin emes, qaraqan qara basynyń qamy úshin, momyn eldi talaý, memleket dáýletin aıaýsyz talan-tarajǵa salý úshin bılike baratyndyǵy;
Otanǵa jasaǵan opasyzdyǵy, halyqqa jasaǵan qııanaty úshin esh jazalanbaıtyny, ári ketse sógispen qutyla alatynyna senimdiligi;
Tarıh pen urpaq aldynda esh jaýap bermeıtindigine kámil senetini t.b.
Zúlfııa – otyz jylǵy Táýelsizdik kezeńinde shyn jylaǵan tuńǵysh mınıstr. Otyz jylda halyqty aıaýsyz qanap kelgen áli de qanaı beretin myna bezbúırek úkimetten qystyǵyp jylaıtyn bir mınıstr shyqty-aý aqyry.
Zúlfııa, seniń kóz jasyń myna dúleı órtti sóndire almas, biraq jylaı tús. Prezıdenttiń qabyldaýyna baryp, Úkimette bolyp jatqan masqaralardy aıtyp jyla, qaýqarsyz premer mınıstrdi otstavkaǵa jiberińiz dep jyla,
"Eski Qazaqstannyń" kúlli kadryn halyqshyl, memleketshil azamattarmen almastyryńyz dep, jyla,
Bılikti jaılaǵan jemqorlyqqa tez arada tótenshe shara qoldanyńyz áıtpese Táýelsizdikten aıyrylamyz dep jyla,
Úkimet otyrysynda da jyla,
Memleketke jemqorlyq saldarynan qaýip tóndi, sender neǵyp otyrsyńdar dep jyla,
19:mıllıon halyqty taqyr kedeı qylǵan kileń betsiz, óńsheń uıatsyzdar dep jyla,
Shalbar kıgen sorlylar, erkek emessińder dep jyla.
Ózderińde ar bar ma, ojdan bar ma, mynandaı jaǵdaıdy kórip otyryp, mınıstr, ákim bolmaq túgili qalaı jer basyp júrsińder dep jyla,
Namystaryń bar ma ózi dep jyla,
Bir silkinip, memleket úshin, halyq úshin jannan keship, adal is qylatyn kezderiń keldi ǵoı dep jyla,
Otanymdy osynshama jegenderiń úshin urpaqtaryń jaýap beredi, ólgen soń kórlerińde tynysh jatpaısyńdar dep jyla,
Aldaryńda ar soty, urpaq soty, tarıh soty tur dep jyla.
Bárin aıtyp jyla, eldiń zaryn aıtyp jyla.
"Estıtin úkimet" halyqtyń jan aıqaıyn estimeıdi ǵoı, bálkim óz ishinen shyqqan jalǵyz sheneýniktiń kóz jasyn kórer, zaryn estir...
