Semeı qalasynda bolǵan tilsiz jaýdan eki adamnyń ómirin Jambaev Dáýren esimdi azamat qutqaryp qaldy. Bul týraly qoǵam belsendisi Býrahan Dahanov Facebook paraqshasyna jarııalady, dep habarlaıdy “Adyrna” ulttyq portaly.
“Keshe chempıondar lıgasyn kórip otyrǵanbyz, aıaq asty kórshi mańaıdan órt shyqqanyn kórip birden dalaǵa shyqtym. Sóıtsem úıdiń janyndaǵy «Banzaı» kafesi janyp jatyr eken. Júgirip baryp ishinde adam joq pa dep kirsem bir jas jigit esinen tanyp qulap qalypty. Ony dalaǵa alyp shyǵyp, alǵashqy kómek kórsettim. Ol esin jıǵan bette ishinde taǵy adam baryn aıtty, biraq órttiń aýqymy keńeıip barady, jalyn bet qaratar emes, tereze jaqtan bir shtordy jyrtyp alyp ishine kirip kettim, álgi adam esikti ishten jaýyp alypty. Ózim esimnen tanyp qala jazdap, syrtqa shyǵyp, ǵımaratty aınalyp terezege kirpish laqtyryp shaqtym, ekinshi adam esin birden jıǵandaı boldy, oǵan kómek kórsetip syrtqa alyp shyqtym. Ary qaraı órt sóndirýshiler kelip óz jumystaryn atqardy”, - deıdi Dáýren.
Sondaı-aq, Dáýren óz ómirin báıgege tigý týraly eshqandaı oıy bolmaǵanyn aıtty.
“Men eń birinshi kezekte órt sóndirý qyzmetkerlerin oqıǵa ornyna shaqyrý úshin, olarǵa birden habarlastym. Alaıda, olar kelgenshe kútip turmaı, ishinde adam joq pa eken dep qatty alańdadym. Mende eshqandaı qorqynysh bolmady. Eń basty mıssııam, ishinde adam bolǵan jaǵdaıda, solardy aman alyp shyǵý boldy. Bastysy olar aman-esen. Men sol úshin qýanyshtymyn, — deıdi ol.
Aıta keteıik, Daýren Jambaev búginde 5 bala tárbıelip otyr. Ol, Semeı qalasy Nazarbaev zııatkerlik mektebi dırektorynyń qarjy-sharýashylyq isi jónindegi orynbasary qyzmetin atqarady.
”Adyrna” ulttyq portaly
