Abaı oblysyndaǵy alapat órtke baılanysty Memleket basshysy Qasym-Jomart Toqaevtyń 11-13 maýsym kúnderi Vetnamǵa josparlanǵan resmı sapary keıinge shegerildi. Bul týraly Aqorda jazdy, dep habarlaıdy «Adyrna» tilshisi.
«Prezıdent shuǵyl keńes ótkizý jáne apattan zardap shekken azamattarǵa kómek kórsetý sharalaryn qabyldaý úshin Abaı oblysyna barýdy josparlap otyr»,—delingen habarlamada.
Buǵan deıin Abaı oblysyndaǵy orman órtiniń órshigenin jazǵan edik. Prezıdent Tótenshe jaǵdaılar mınıstri Iýrıı Ilınge oqıǵa ornyna jedel baryp, órt sóndirý jumystaryn basqarý mindetin júktedi. Qazirgi tańda Abaı oblysynda 6 ýchaskede órtti sóndirý jumystary jalǵasyp jatyr. Tilsiz jaýdy sóndirýge TJM, Orman sharýashylyǵy komıtetinen, jergilikti atqarýshy organdardan jáne Qorǵanys mınıstrliginen 600 astam adam, 168 tehnıka jumyldyryldy.
