Абай облысындағы алапат өртке байланысты Қасым-Жомарт Тоқаев Төтенше жағдайлар министрі Юрий Ильинге оқиға орнына жедел барып, өрт сөндіру жұмыстарын басқару міндетін жүктеді. Бұл туралы Ақорда жазды, деп хабарлайды «Адырна» тілшісі.
Үкіметке және Абай облысының әкімдігіне қаза тапқан орман шаруашылығы қызметкерлерінің отбасыларына барлық қажет көмекті көрсету тапсырылды.
Төтенше жағдайлар министрлігінің мәліметінше, орман шаруашылығының үш қызметкері қаза тапты, тағы 11 қызметкер іздестіріліп жатыр.
Айта кетейік, қазіргі таңда Абай облысында 6 учаскеде өртті сөндіру жұмыстары жалғасып жатыр. Тілсіз жауды сөндіруге ТЖМ, Орман шаруашылығы комитетінен, жергілікті атқарушы органдардан және Қорғаныс министрлігінен 600 астам адам, 168 техника жұмылдырылған. Орман шаруашылығы комитетінің ақпаратына сәйкес, өрт ауданы 30 000 гектарды құрайды.
