Ph.D. doktor, belsendi Dáýrenbek Nysanov memleket basshysyna eldegi túıtkildi máselelerdi qozǵap hat joldady, dep habarlaıdy "Adyrna" portaly.
Óz jazbasynda ol qazaq qoǵamyna "qajetsiz" dep esepteıtin saıası kelisimderdi, odaqtardy qozǵap "Jańa Qazaqstan" jasaýdy qolǵa alý qajettigin aıtty.
"Qasym-Jomart Kemeluly!
Ár eldiń óz ıdeologııasy bar ekenin jaqsy bilesiz, sony kóre tura óz memleketimizdiń ıdeologııasyn jasamasańyz egemendigimizge qaýip tónedi.
Ol úshin:
1) Qazaqstannyń aqparattyq keńistigin “reseıdiń buqaralyq aqparattyq quraldarynyń” aqparatynan tazartýdy qolǵa alý kerek! Sebebi, elimizde reseıdiń ıdeologııasyna qyzmet etetin reseıshilder kóbeıip ketti.
2) “Saýdada dostyq joq” degendi eskerip, Reseımen qurǵan odaqtardyń bárinen shyǵý kerek!
Sebebi, Reseıge salynǵan sankııa bizdiń ekonomıkamyzdy quldyratyp jatyr. Eń jamany Reseı ózimen odaq qurǵan elderge óz ústemdigin júrgizgisi keledi, óz ıdeologııasyn tyqpalaıdy. Ony tarıh pen sońǵy 30 jyl ishindegi oqıǵalar dáleldep jatyr.
3) Qazaqstannyń Táýelsizdigine nuqsan keltirýge jol bermeıtin ıdeologııa bolmasa, Qazaqstan azamattaryna Otan qorǵaıtyn memleketshildik sana qalyptastyra almaısyz.
Sebebi, “Qazaqstan kóp ultty memleket” degendi doǵarmasańyz “Qazaqstan meniń Otanym” degen uǵymdy árbir el azamatynyń boıyna sińdire almaısyz!
Halyq Sizdi “kásibı dıplomat” dep oılaıdy. Biraq, Siz kásibı dıplomat retinde ár túrli etnıkalyq toptardan turatyn dıasporalary bar mono ultty qazaq memleketin “kóp ultty memleket” dep ataýdyń durys emes ekenin bilesiz be? Bilmeýińiz múmkin emes!
Degenmen, solaı ataý elimizdiń ıdeologııasyna qarsy uǵym ekenin eskermegenińizdi qalaı túsinemiz?
Soǵan baılanysty, eń birinshi kezekte elimizdiń bıýdjetine artyq shyǵyn keltiretin, qoǵamnyń durys jolǵa túsýine eshqandaı paıdasy joq, eldiń yntymaqtyǵyn arttyra almaıtyn túkke qajeti joq “Qazaqstan halqy assambleıasyn” jabýyńyzdy suraımyn.
Meniń aıtqandarymdy durys emes deıtin bolsańyz, Sizge mysal keltireıin. Alysqa barmaı-aq eki jaǵymyzdaǵy kórshilerimizdi, Reseı men Qytaıdy mysalǵa alaıyq. Reseıdiń quramynda 190 ult bar. Biraq olar ózderin “kóp ultty memleketpiz” dep aıtpaıdy. Reseıde orys tilinen basqa til júrmeıdi. Bul durys ustanym jáne myqty ıdeologııa. Óıtkeni, bir ǵana tilde sóıleıtin memlekettiń halqynda alaýyzdyq bolmaıdy, yntymaǵy berik bolady. Ol árbir el azamatyna Memleketshildik sanany qalyptastyrady.
Sol sııaqty Qytaıda da 56 ult bar. Biraq olar ózderin “kóp ultty memleketpiz” dep aıtpaıdy, bir ǵana qytaı tilinde sóıleıdi.
Sondyqtan, memleket múddesine qyzmet etetin, Otan qorǵaıtyn yntymaǵy mol, birtutas patrıot halyqty qalyptastyrýda Qazaqstan keńistiginde qazaq tilinen basqa resmı tildiń bolmaýy jáne “kóp ultty memleketpiz” degen alaýyzdyq týdyratyn uǵymdy sanamyzdan óshirý mańyzdy.
“Jańa Qazaqstan” qurylysshysy
Daýrenbek Myrzashuly Nysanov" delingen belsendiniń hatynda.
