Astananyń keı aýdanynda sý jetispeýshiligi bar deıdi tanystarymyz. Negizi sý máselesi bizdiń elimiz úshin aldaǵy tańda óte ózekti, basty másele bolady. Elimizdegi Ile, Ertis, Syrdarııa, Shý, Talas, Jaıyq jáne basqa iri ózenderdiń barlyǵy derlik bastaýyn basqa elden alady.
Memleketke tutas sý saıasatyn qaıta qaraý kerek. Sýdy únemdeýge qatysty tyń sharalar qajet. Balalardy sýdy únemdeý mádenıetine balabaqsha/mektepten úıretý kerek. Aýyl sharýashylyǵynda tamshylatý syndy sýdy az qajet etetin tehnologııalardy engizýde memleket sharýalarǵa qoldaý kórsetýi mańyzdy. Sý saqtaý qoımalarynyń sanyn arttyrý, qystaǵy qar sýyn júıeli jınaý áreketteri iske asýy tıis. Bul iske asýǵa tıis sharalardyń bir sypyrasy ǵana.
Ótkende Iran men tálibter Gılmend ózeni úshin atysyp-shabysty. Tálibter sý qoımasyn salyp jatyr, ol Irandaǵy sý tapshylyǵyn arttyrady. Demek bolashaqta qaqtyǵys jańa qarqynmen jandanýy múmkin.
Al bizde she? Tájikstan da sý qoımalaryn salýda. Ol Ortalyq Azııadaǵy sý máselesin kúrdelendiredi. Qytaı Shyǵys Túrkistanda sý bógetterin salýda. Bul bizdiń aýmaǵymyzdaǵy Ile pen Ertistiń sý deńgeıin túsirýde. Dál osyndaı kórinis ońtústikte de, batysta da bar. Aldyńǵy onjyldyqta sý úshin kórshiles eldermen kúrdeli kelissózder ótedi degen sóz.
Eýropa halqy paıdalanǵan sýyn birneshe márte qoldanady degendi estip óstik qoı. Arasynda kúldik te. Sondaı kezeńge ózimiz de aqyryndap jaqyndap qalǵandaımyz ba, qalaı?..Adamzat qazir munaı/gaz úshin qyrqyssa, alda sý úshin soǵysady. Kórinisteri qazirdiń ózinde bar.
