Túrkistan oblysy qylmystyq ister jónindegi mamandandyrylǵan aýdanaralyq sotynda kisi óltirý faktisi boıynsha qylmystyq is qaraldy. Is barysynda kúdiktiniń tanysyn qalaı baltalap óltirgeni aıtyldy. Bul týraly "Adyrna" ulttyq portaly Stan.kz aqparat agenttigine silteme kórsete otyryp habarlaıdy.
Oqıǵa bıylǵy jyldyń naýryz aıynda bolǵan. Ishimdik ishken eki turǵynnyń is-áreketi adam ólimimen aıaqtaldy.
Kúdikti uıyqtap jatqanda balta ustap kelgen jábirlenýshi ony soqqyǵa jyǵyp, baltanyń aǵash sabymen qylqyndyrǵan.
Sodan kúdikti qolyna ilingen qaıshyny jábirlenýshiniń qolyna suǵyp, baltany kúshtep tartyp alǵan.
Qarsylasynyń bas tusynan baltanyń júzimen birneshe ret soqqy jasaıdy. Aýyr dárejeli dene jaraqatynan jábirlenýshi sol jerde mert bolǵan.
"Sottalýshy kinásin tolyq moıyndady. Sot úkimimen sottalýshyǵa QR QK 99 baby 1-bóligimen 9 jylǵa bas bostandyǵynan aıyrý jazasy taǵaıyndaldy. Qylmystyq-atqarý júıesiniń qaýipsizdigi ortasha mekemesinde óteý belgilegen. Úkim zańdy kúshine engen joq" - delingen Túrkistan oblystyq sotynyń baspasóz qyzmeti taratqan aqparatta.
"Adyrna" ulttyq portaly
