Jeli belsendisi Erlan Mazan óziniń Facebook paraqshasyna Qazaqstan jeriniń Qytaıǵa satylyp jatqanyn jazdy, dep habarlaıdy “Adyrna” ulttyq portaly.
Jazbada, Qytaı saıtynyń sýreti de jarııalanǵan.
Oıda-joqta Qytaıdaǵy jer jaldaý saıtyna tap bolyp, tańqaldym. Álgi Jer kodeksi arqyly sheteldikterge jalǵa berilmeıtin bolyp sheshilgen aýylsharýashylyq maqsatyndaǵy qazaqtyń jeri ol saıtta arzan baǵamen ashyq saýdaǵa salynyp jatyr. Bul endi baryp turǵan bassyzdyq qoı! - dedi jazba avtory.
Bul máselege Aýyl sharýashylyǵy mınıstrligi de ún qatty. Vedomstvonyń baspasóz hatshysy Damır Aspan Facebook paraqshasynda jaýap berdi.
“Ottamasyn! Alaqandaı jer bolsa da sheteldikterge satylmaıdy jáne jalǵa da berilmeıdi! QR Jer kodeksiniń 24-babyna saı Aýyl sharýashylyǵy maqsatyndaǵy jer ýchaskelerin sheteldikterge berýge qatań tyıym salynǵan.
Tipti sheteldiktermen nemese azamattyǵy joq adamdarmen nekede turǵan Qazaqstan azamattaryna jer berilmeıdi!» - dedi ol
Artynsha Jer komıtetiniń tóraǵasy – QR Jerdi paıdalaný men qorǵaý jónindegi bas memlekettik ınspektory Murat Temirjanov ta óz jaýabyn jazdy.
Áleýmettik jelide jarııalanǵan Qytaı eliniń saıtyndaǵy Qazaqstan aýmaǵyndaǵy jerlerdiń satylatyndyǵy týraly aqparat jalǵan ekendigin málimdeımiz. Sonymen qatar, Kodekstiń 38-babynyń 5-tarmaǵyna sáıkes jeke jáne zańdy tulǵalarǵa ýaqytsha jer paıdalaný quqyǵymen tıesili aýyl sharýashylyǵy maqsatyndaǵy jer ýchaskelerin aýyl sharýashylyǵy óndirisin júrgizý úshin keıingi jer paıdalanýǵa (sýbarendaǵa) berýge jol berilmeıdi.
Eger kez kelgen sýbektiler tarapynan atalǵan zań normalaryn buzý derekteri anyqtalǵan jaǵdaıda olarǵa jol bergen sýbektiler zańnama talaptaryna sáıkes jaýapqa tartylady jáne bul másele mınıstrliktiń turaqty baqylaýynda», - dedi Murat Temirjanov.
