Qasym-Jomart Toqaev «Ortalyq Azııa – Qytaı» sammıtinde Qytaımen jan-jaqty yntymaqtastyqty nyǵaıtý Qazaqstannyń ornyqty damýyna múmkindik beretinin aıtty, dep habarlaıdy «Adyrna» tilshisi Aqordaǵa silteme jasap.
«Qytaı – álemdegi asa iri ınvestor jáne jahandyq ekonomıkanyń kóshin bastap turǵan memleketterdiń biri. Sondyqtan, Qytaımen jan-jaqty yntymaqtastyqty nyǵaıtý Qazaqstannyń ornyqty damýyna múmkindik beredi.
Ortalyq Azııa elderiniń áleýetin Qytaıdyń orasan zor ekonomıkalyq qýatymen ushtastyrý asa mańyzdy. Bul qadam kóp qyrly seriktestigimizge tyń serpin bereri sózsiz. Bizdiń elimiz osy maqsatqa jetý úshin bar kúsh-jigerin jumsaýǵa daıyn»,—dedi ol.
Baıandama barysynda Memleket basshysy memletter arasyndaǵy ortaq múddege saı keletin yntymaqtastyqtyń mańyzdy baǵyttaryna toqtaldy.
Olar:
1. Taýar aınalymyn arttyrý;
2. Elektrondy saýda salasynda ózara alys-beristi ulǵaıtý;
3. Kólik-logıstıka ınfraqurylymyn damytý;
4. Ónerkásip salasyndaǵy yntymaqtastyqty nyǵaıtý;
5. Energetıka salasyndaǵy, onyń ishinde, munaı-gaz sektoryndaǵy qarym-qatynasty damytý;
6. Aýyl sharýashylyǵy salasyndaǵy yqpaldastyqty damytý;
7. Transshekaralyq sý resýrstaryn tıimdi paıdalaný;
8. Mádenıet jáne bilim salasyndaǵy yntymaqtastyqty, sondaı-aq týrızmdi damytý;
9. Aımaqtyń qaýipsizdigin jáne turaqtylyǵyn qamtamasyz etý.
