Ýkraına prezıdenti Vladımır Zelenskııge Qyrymnyń ornyna Túrkııaǵa shabýyl jasaýdy usynǵan Almaty qalasy máslıhatynyń depýtaty Anna Bashınskaıanyń qolynda 6 mıllıard teńgeden asatyn júzge jýyq memlekettik kelisimsharttar bar, dep jazady "Adyrna" portaly. Bul týraly ulysmedia.kz habarlady.
Kásiporynnyń iri kelisimsharttary Almatydaǵy Áýezov aýdany ákiminiń apparatymen, Almaly aýdany ákiminiń apparatymen, ekologııa jáne qorshaǵan ortany qorǵaý basqarmasymen, tabıǵı resýrstar jáne tabıǵatty paıdalanýdy retteý basqarmasymen, «Almaty jylý jelileri» JShS-men jasalǵan.
Osy kelisimderge qaraǵanda, depýtat teń quryltaıshy bolyp tabylatyn «LEU» fırmasy Almatydaǵy Gandı saıabaǵyn, Imanov alańyn, Gandı saıabaǵynyń batysyndaǵy skverdi abattandyrýmen jáne Áýezov aýdanyndaǵy jasyl jelekterdi qorǵaýmen aınalysyp jatyr.
Anna Bashınskaıa - Almaty qalalyq máslıhatyna Amanat partııasynan saılanǵan depýtat. Ol Facebook-tegi Deutsche Welle paraqshasyndaǵy Zelensskııdiń jospary týraly jańalyqqa Qyrymnyń ornyna, Túrkııaǵa shabýyl jasaýdy usynyp, pikir qaldyrǵan. Bul pikir paraqshada daý týdyrǵan. Sońynan depýtat jazǵanyn alyp tastap, óziniń áleýmettik jelidegi paraqshasynda "oılanbaı aıtqan" pikiri úshin keshirim suraǵan.
Amanat partııasy basshylyǵy bul máselege qatysty ázirge málimdeme jarııalamady.
