Búgin Jańaqorǵan aýdanynyń «Birlik» jáne «Qyrash» eldi mekenderine gaz qubyryn qosý rásimi ótti. Aldaǵy ýaqytta taǵy da 5 aýylǵa «kógildir otyn» kirgizý josparda bar. Is-sharaǵa oblys ákimi Nurlybek Nálibaev qatysyp, aýyl turǵyndaryn quttyqtady.
«Memleket basshysy Qasym-Jomart Kemeluly: «Asa mańyzdy máselelerdiń biri – aýyldy keshendi túrde damytý. Aýyldarǵa naqty qoldaý kórsetip, zamanaýı ınfraqurylymdy damytýymyz kerek» degen bolatyn. Prezıdentimiz ben Úkimettiń Syr óńirin erekshe qoldaýynyń arqasynda aımaǵymyzda aýqymdy jobalar júzege asýda. Ótken jyly 14 gazdandyrý jobasyn júzege asyrýǵa 8,7 mlrd.teńge bólinip, ıgerildi. Nátıjesinde 6 aýyldy gazǵa qostyq.
Osylaısha óńirdiń gazdandyrý deńgeıi 70 paıyzǵa jetti. Bul – 26 eldi meken, 583 myńǵa jýyq turǵyn tabıǵı gazben qamtyldy degen sóz. Bıylǵa respýblıkalyq bıýdjetten 7,4 mlrd. teńge bólinip, 2022 jyly bastalǵan 7 joba jalǵasty jáne 12 jańa jobanyń qurylysy bastalady. Onyń ishinde, Jańaqorǵan aýdanynynyń «Jaıylma», «Shalqııa», «Quttyqoja», «Tómenaryq», «Keıden» aýyldaryna «kógildir otyn» kirgizý jumystary bastalady. Budan bólek, ótken jyly quny 3,4 mlrd. teńgeni quraıtyn Jańaqorǵan kentindegi 10/0,4 kV elektrjelilik júıeni jańǵyrtý jumystary qolǵa alynǵan. Sonyń arqasynda kenttegi 70 shaqyrymǵa jýyq elektr jelisi jańaryp, qosymsha jańadan 23 transformator ornatylady», – dedi aımaq basshysy.
Aýyl turǵyndaryn qoǵam qaıratkeri Bekmyrza Elamanov quttyqtady, «Aqúıik» aýyldyq okrýginiń ardagerler keńesiniń tóraǵasy Sáýlebek Beısenbaev alǵys bildirip, bata berdi.
Aıta keteıik, «Aqúıik» aýyldyq okrýgindegi «Birlik» aýylyna gaz qubyryn «Gas Energy Construction» JShS júrgizdi. Joba respýblıkalyq jáne oblystyq bıýdjetten qarjylandyryldy, ony iske asyrý nátıjesinde 440 turǵyn úı men 5 áleýmettik nysan gazdandyryldy.
Munan ári oblys ákimi «Qyrash» aýylyn gazǵa qosý rásimine qatysty. Bul eldi mekende 124 turǵyn úı men 6 áleýmettik nysan «kógildir otynǵa» qosyldy.
Saltanatty is-sharada aımaq basshysy aýyl turǵyndaryn quttyqtady. Qoǵam qaıratkeri Ibragım Ábıbýllaev sóz sóılep, aýyldyq okrýgtiń qoǵamdyq keńes tóraǵasy Sultanhan Aqylbekov bata berdi. Ári qaraı Nurlybek Mashbekuly «Qyrash» aýylynyń ımamy Ábdimálik Shahanovtyń úıine baryp, gaz tutynǵan turǵyndardyń qýanyshyna kýá boldy.
Eske salsaq, bıyl Memleket basshysynyń qoldaýymen aýyldyq jerlerde áleýmettik nysandardyń qurylysy qarqyndy júrýde. Atap aıtqanda, «Jaıly mektep» ulttyq jobasy aıasynda aldaǵy 3 jylda oblysta 15 100 orynǵa arnalǵan quny 100 mlrd. teńgeden asatyn 21 mekteptiń qurylysy júrgiziledi. Bıyl 10 mekteptiń qurylysy bastalady. Onyń 2-ýi Jańaqorǵan aýdany ortalyǵynan salynady.
«Aýylda densaýlyq saqtaýdy jańǵyrtý» ulttyq jobasy aıasynda 2023-2024 jyldary oblysta 27 densaýlyq saqtaý nysany salynady. Bıyl dárigerlik ambýlatorııanyń qurylysy «Qaratóbe» aýylynda, kelesi jyly «Talap», Ábdiǵappar aýyldarynda bastalady. Al, 2025 jylǵa qaraı Jańaqorǵan aýdanaralyq aýrýhanasyn «kópbeıindi aýrýhana» deńgeıine jetkizý jumystary júrgizilýde.
Munan bólek, «Jaıylma», «Ózgent» aýyldarynda 150 oryndyq klýb, «Aqjol» aýylynda deneshynyqtyrý-saýyqtyrý kesheniniń qurylysy júrgizilýde. Nysandar bıyl shilde aıynda paıdalanýǵa berilmek.
