Almatynyń Túrksib aýdanyndaǵy bazardan basy tabylǵan áıel VICh ınfekııasymen aýyrǵan.
Bul týraly marqum ýaqytsha panalaǵan áleýmettik beıimdeý ortalyǵynyń qyzmetkeri Yryskúl Qusaıynqyzy málimdedi, dep jazady "Adyrna" ulttyq portaly.
Eldiń esin ekeý, túsin tórteý qylǵan qylmys 12 sáýirde bolǵan edi. Marqumdy tanıtyn Túrksib aýdanyndaǵy dúken satýshysy áıeldiń bassyz denesin Sholohov kóshesindegi saıabaqtan ıt tapqanyn aıtady.
Dene tabylǵan jerde áli de uıyǵan qannyń qaldyǵy bar. Al satýshy bas salynǵan pakette qan bolmaǵan deıdi.
Zańger Nurlan Baıǵazınniń aıtýynsha, qandy qylmysty qaskóı aldyn ala josparlaýy múmkin.
«Ol is-áreketine jaýap beretin adam. Óıtkeni túrin kórsetpedi, eńkeıip turdy. Bas kıimin tómen túsirip alǵan. Ol basty jýýy kerek aparyp. Ol úshin sý aǵatyn jerge ne úıge aparý kerek degendeı. Sonyń bári qanshama ýaqyt qoı. Basty kesý, jýý, tazalaý, paketke salý – bárin oılastyrǵan», - deıdi ol.
Aıta keteıik, qaskóıdiń qolynan qaza tapqan áıeldiń jasy 47-de. Turǵylyqty jeri joq, buryn esirtki qylmysy úshin birneshe ret sottalǵany aıtylady. 27 jastaǵy bir qyzy bar. Marqumdy tanıtyndar onyń kúıeýi de túrmede otyrǵanyn, ózi úısiz, dala kezip júretinin aıtqan.
Ol qaza tabarynan shamamen 4 aı buryn áleýmettik beıimdeý ortalyǵyn panalaǵan. Bul mekemede 3 aı turyp, qaıta shyǵyp ketipti.
