65 jastaǧy Ester Ulman — Şveisariia tūrǧyny. Qazırgı taŋda ol qazaq tılın üirenıp jür. TikTok jelısınde tanymal bolyp ülgergen äiel «Adyrna» tılşısıne tıl meŋgeruge degen qyzǧuşylyǧy neden bastalǧanyn aityp berdı.
«Barlyǧy da Dimaş Qūdaibergennıŋ önerın tamaşalaǧannan keiın bastaldy. Onyŋ şyǧarmaşylyǧymen America’s Got Talent baiqauy kezınde tanystym. Önerı menı taŋǧaldyrdy. Osylaişa ärtıstıŋ talantyna bas igen milliondaǧan janküierınıŋ bırıne ainalǧan jaiym bar. Keiın änderınıŋ ne turaly ekenın ūǧynyp, ūltynyŋ mädenietımen jaqynyraq tanysu üşın qazaq tılın üirenuge bel budym. Şyny kerek, menıŋ jasymda jaŋa tıldı meŋgeru oŋai emes. Dese de, barynşa tyrysyp jürmın. Baqytyma orai, onlain kurs tauyp, jazylyp aldym. Qazırgı taŋda qazaq tılınen sabaq beretın mūǧalımım de bar», - deidı ol.
Şveisariialyq äiel qazaqtardyŋ qonaqjai halyq ekenın erekşe atap öttı.
«Men Qazaqstanda 2 märte boldym. Alǧaş ret 2022 jyldyŋ qyrküiegınde Dimaştyŋ Almatyda ötken konsertıne kelgen edım. Otandastaryŋyz menı öte jyly, zor qūrmetpen qarsy aldy. Būndai ystyq ıltipatty kütpedım. Ekınşı ret, mıne, biyl sızdermen bırge Nauryz merekesın atap öttım. Atmosfera erekşe boldy. Osy saparymda köptegen qazaqstandyqpen tanystym. Olarmen bırge Almatynyŋ ädemı jerlerın aralap, köjeden däm tättım.
Menı dūrys tanymaityn jandarǧa deiın üilerıne ne meiramhanalarǧa şaqyryp, dastarhandarynan däm tattyrdy. Üiıme qaitarda syilyq toly bagajben kettım ǧoi. Būnyŋ barlyǧy da eşqaşan ūmytylmaityn, taŋǧajaiyp estelıkter!»-deidı Ester Ulman.
Äŋgıme barysynda ol Qazaqstanǧa taǧy da kelgısı keletının jetkızdı.
“Aldaǧy uaqytta basqa da oblystar men qalalardy aralaǧym keledı. Ol kezde būdan da köp emosiia alatynyma senımdımın. Barşaŋyzdy qazaq tılın üirenuge şaqyramyn. Qazaq tılı — öte ädemı tıl»,- deidı şveisariialyq äiel.
Diana ASAN
"Adyrna" ūlttyq portaly
