Búgin Shymkentte qaıtarymsyz grant ıegerleriniń ónimderi usynylǵan kórme-jármeńke ótti. Is-sharaǵa qala ákimi Murat Áıtenov qatysyp, 150-ge jýyq shaǵyn jáne orta bıznes ókilderiniń jobalarymen tanysty.
«Taýarlardy jasaýǵa kásipkerlerdiń bar ónerin, ynta-yqylasyn salǵany kórinip tur. Memleket usynǵan granttardy konkýrs arqyly jeńip alǵan qala turǵyndary óz bıznesin bastap, sapaly ári naryqta suranysqa ıe taýarlardy óndirip jatyr. Bul bir jaǵynan shymkentikterdiń kásipke beıim ári eńbekqor ekenin kórsetse, ekinshi jaǵynan memlekettiń shaǵyn jáne orta bızneske kórsetip jatqan qoldaýynyń naqty nátıjesi» - dedi qala ákimi.
Jármeńkede kondıterlik ónimder, jıhaz óndirý, qyzmet kórsetý salalary boıynsha túrli áleýmettik jobalar qoıyldy. Sondaı-aq arnaıy aqparattyq burysh jasaqtalyp, «Halyqty jumyspen qamtý ortalyǵynyń» mamandary kelýshilerge tegin kásibı oqý, turaqty jumysqa ornalasý, sýbsıdııalanatyn jumys oryndaryna joldama alý boıynsha keńester berdi.
Aıta keteıik, ótken jyly qalamyzda 1 myńnan astam adam jańa bıznes ıdeıalardy júzege asyrý úshin qaıtarymsyz granttardy jeńip alǵan. Al, 2 myńnan astam adam tegin kásibı oqýǵa jiberilgen. Memleket tarapynan beriletin qoldaý sharalary bıyl da óz jalǵasyn tabýda. Qala boıynsha 447 adamǵa 400 AEK deıingi mólsherde qaıtarymsyz grant berý josparlanyp otyr.
