Halyqaralyq áıelder kúni men Ulystyń uly kúni – Naýryz merekesine oraı Shymkent qalalyq A.Pýshkın atyndaǵy ámbebap kitaphanasynyń uıymdastyrýymen «Ulttyq kıim — halyq qazynasy» atty is-sharasy ótti. Jıynda boıjetkender men analarǵa ulttyq naqyshtaǵy zamanaýı kıim úlgileri dáripteldi.
Qazaq halqynyń qolóneri — el tarıhymen qatar damyp, órkendep kele jatqan halyq qazynasy. Al, qolónerdiń aıshyqty bóligi — ulttyq kıimder. Ulttyq kıimderdiń tarıhy, tigilý tehnıkasy óte erekshe.
— «Ulttyq kıim — halyq qazynasy» is-sharasy arqyly qazaqtyń ulttyq kıimderin óskeleń urpaqqa nasıhattaýdy maqsat etip otyrmyz. Búgingi jıyn «Naýryz Shymkentten bastalady» degen uǵymnyń dáleli desem de bolady. Halyqaralyq áıelder kúni qarsańynda kitaphanada arnaıy kórkemsýret kórmesi uıymdastyrylsa, Ulystyń uly kúnine oraı ulttyq kıimdi nasıhattap otyrmyz. Ulttyq kıimderdi dáriptep, qurmetpen qaraý jáne ony kúndelikti kııý — árbir óskeleń urpaqtyń paryzy. Sebebi, ulttyq kıim qazaq halqynyń tarıhynan, ádet-ǵurpy men salt-dástúrinen, mádenıetinen syr shertedi, - deıdi A.Pýshkın atyndaǵy ámbebap kitaphana ádiskeri Raýshan Teńlibaeva.
Jıynǵa QR Mádenıetiniń qaıratkeri, dramatýrg S.Qasymbek, jeke kásipker, «A.Gulmira collection» brendiniń negizin qalaýshy G.Amanjolova, «Analar» jýrnalynyń redaktory A.Mombek, Á.Qasteev atyndaǵy óner jáne dızaın kolledji men №5 tehnıkalyq kolledj oqytýshylary men stýdentteri qatysty. Jıyn barysynda «A.Gulmira collection» brendiniń ulttyq kıimder toptamasy men atalmysh kolledj stýdentteriniń jumysy kórsetildi.
