Belgili zańger ári Qazaqstan Respýblıkasynyń Parlament saılaýyna úmitker Abzal Quspan BQO turǵyndaryna sý tasqyny saldarynan kelgen zardaptarymen kúresetinin aıtyp, beıneúndeý joldady, dep habarlaıdy “Adyrna” ulttyq portaly.
“Keshe meniń shtabym sý tasqyny oqıǵalaryna oraı, belsendi saılaýaldy nasıhatty toqtatý týraly sheshim qabyldaǵan bolatyn ol týraly beıneúndeýimde jarııaladym.
Problema ótken aptada bastalǵan bolatyn, biraq ol kezde maǵan sala mamandary endi bir kúnnen soń sý keri qaıtyp, másele turaqtanady dep sendirgen edi. Alaıda sońǵy eki kúnde jaǵdaı qaıtadan kúrdelendi, nátıjesinde oblys boıynsha 4 aýdanda tótenshe jaǵdaı jarııalandy. Bundaı kezde saılaý dep eldiń mazasyn alǵan durys bolmas.
Qazirgi basty másele – sý apatyna ushyraǵan azamattarǵa jan-jaqty qoldaý kórsetý, sondaı-aq osyndaı apattardyń týyndaý sebepterin zerdeleý jáne aldaǵy ýaqytta olardyń aldyn alýdy oılastyrý qajet.
Erteńderi sońǵy eki kúngi jumysymyzdyń nátıjesin kóretin bolasyzdar”,- dep jazdy ol Facebook paraqshasynda.
