Oralda 47 jastaǧy er adam zeinetker äjeidı tonap kettı. Küdıktı 77-degı tūrǧyndy tonamas būryn basynan ūryp qūlatqan. Būl turaly BQO polisiia departamentınıŋ baspasöz qyzmetı mälımdedı, dep habarlaidy “Adyrna” ūlttyq portaly.
Vedomstvo mälımetınşe, zeinetker sauda üiındegı aqşa aiyrbastau punktıne kelıp, aqşasyn aiyrbastamaq bolǧan. Elektrondy tabloǧa qarap, valiuta baǧamyna üŋılgen ol aqşasyn keiınırek aiyrbastaimyn dep şeşım qabyldaǧan.
Äjeidı baiqap qalǧan beitanys er adam onyŋ artynan ılesıp, aŋdyp kelgen. Üiıne deiın jetıp, podezdıŋ aldyna kele bergende basynan ūryp qūlatyp, qolyndaǧy paketın tartyp alyp ketken.
Paket ışınde azyq-tülık pen aiyrbastamaqşy bolǧan 200 myŋ teŋge kölemındegı aqşa salynǧan ämiian bolǧan.
Polisiia qyzmetkerlerı jürgızgen jedel-ızdestıru ıs-şaralary nätijesınde küdıktı ūstaldy. Ol ūrlanǧan aqşany jaratyp ülgerıptı.
Atalǧan faktı boiynşa Qylmystyq kodekstıŋ 191-baby 2-bölıgıne (Tonau) säikes sotqa deiıngı tergeu amaldary jürgızılude. Ūstalǧan azamat uaqytşa ūstau izoliatoryna qamauǧa alyndy.
Ūqsas jaŋalyqtar
