Semeıde kómir alatyn qoımadaǵy kezekke talas barysynda qaza tapqan sportshy jigittiń ólimine qatysty sot otyrysy bastaldy. Biraq, mert bolǵan azamattyń týystary tergeýshiniń jumysyna kóńilderi tolmaıtynyn aıtady. Oǵan sebep, áýel basta Jasulan Ábıevti óltirdi degen kúdikpen 3 birdeı azamat ustalǵan. Biraq, qazadan keıin birneshe kún ótpeı sol kúdiktilerdiń ekeýi kýágerge aınalyp shyǵa kelgen kórinedi. Tergeý ızolıatoryna tek bireýi qamalypty. Bizdiń arnaǵa habarlasyp kómek suraǵan marqumnyń jaqyndary bul jerde tanys-tamyrlyqtyń izi bar ekenine senimdi dep habarlaıdy «Eýrazııa birinshi arnasy».
«Ákemiz qaıda deıdi? Ákemiz qaıda dep álden surap jatyr. Jazda keledi dep qoıamyz. «Apa, ákemiz japyraq shyqqanda jazda keledi», – dep aıtady», – deıdi marqumnyń anasy.
Gúlnár Ábıevanyń ulynan el aman, jurt tynyshta aıyrylyp, qara jamylǵanyna 3 aı boldy. Nemereleri «ákemiz qaıda?» dep suraǵan saıyn ana júregi qars aıyrylady. Ol kisiniń aıtýynsha, qylmystyń astarynda tek kómirge talas jatqan joq.
«Birdeńe bar sııaqty. Jaı kómir úshin, kezek úshin adam óltirmeıdi. Áıtpese jaraıdy kelispeı qaldy kezekke, kelispese de birdeńe bary anyq. Temirmen uryp óltirgeni anyq. Óıtkeni Almatydan saraptamadan konvert aldyq. Ashyp advokatqa berdik. Osy ekinshi sotta kórsetemiz. Eger kelmese komıssııa shaqyrtyp, qaıta qazdyryp teksertemiz», – dep egiledi marqumnyń anasy Gúlnár Ábıeva.
Marqumnyń ákesi Amantaı Ábıevti qylmys bolǵan kúni tergeýshi 3 kúdikti de qamaýǵa alyndy dep sendirgen. Jerleý rásimin ótkizip, es jıǵan soń mán-jaıdy bileıin dese ýaqytsha tergeý ızolıatorynda tek bir ǵana azamat otyrǵanyn bilgen. Onyń ózin tergeýshiler qorǵashtap otyr, deıdi ol.
«Montajdaıtyn eki qural sol jerde qalǵan. Sol tóbeles bolǵan jerde qalǵan. Endi ekeýi de tergeýshiniń kabınetinde tur. Tergeýshi olardyń KamAZ júrgizýshilerinen túsip qalǵanyn aıtady. Qalaı túsip qalady? Qolynda izi joq desek, qolǵappen soqqan deıdi. Tergeýshiniń ózi advokat bolyp otyr», – deıdi marqumnyń ákesi Amantaı Ábıev.
Semeıde ótip jatqan sot otyrysynyń tyńdalymyna qolyna kisen salynyp ákelgen kúdikti ólimniń abaısyzda bolǵanyn aıtyp, óz kinásin tolyq moıyndamaıtynyn alǵa tartty.
Al kúni keshe kýáger atanǵan taǵy bir azamat tóbelesti birinshi bolyp bastasa da oqıǵanyń jelisin umytyp qalypty.
Men ol sátti kórmedim. Esimde joq», – deıdi kúdikti.
Qylmystyq is boıynsha sot otyrysynyń bastalǵany keshe ǵana. Sportpen shuǵyldanyp, salaýatty ómir saltyn ustanǵan atpaldaı azamatty tek bir adam judyryqpen óltire almaıdy. Iaǵnı, kýágerlerdi durystap tergeý kerek deıdi marqumnyń týystary. Al advokat áliptiń artyn baǵý kerek degen pikirde.
«Jınaqtalǵan dálelderge qarap is 106-bap 3-tarmaq (Densaýlyqqa qasaqana aýyr zııan keltirý, abaısyzda jábirlenýshiniń ólimine ákep soqqan ne qylmystyq top jasaǵan is-áreketter) boıynsha qaralyp jatyr. Proess endi bastaldy. Sot otyrysynda basqa da qylmystar ashylyp jatatyn bolsa biz isti qosymsha tergeýge jiberýdi suraıtyn bolamyz. Ázirshe ashyp aıta alatynym osy», – deıdi advokat Damır Qurmanov.
Tóbeles, uzyn sonar kezek Qarajyra kómir qoımasy úshin tańsyq dúnıe emes. Jyl saıyn mezgiline qaraı munda osyndaı kıkiljińder jıi bolyp turady. Mine, sonyń kesirinen tutas bir otbasy asyraýshysynan aıyrylyp otyr. Beti ashylmaǵan derekterdiń kóptigine baılanysty sot proesi áli biraz ýaqytqa deıin sozylatyn syńaıly.
