Astana qalasynda qańtardyń 30-shy juldyzynda mıtıng ótti. Ákimdiktiń ruqsatymen ótken qarsylyq akııasyna jınalǵan top áıelderge kórsetiletin zorlyq-zombylyq taqyrybyn kóterdi, dep jazady "Adyrna" ulttyq portaly.
Mıtıngige elýden asa adam jınaldy. Olardyń qoıǵan talaptary - turmystyq jáne jynystyq harrasment jasaǵandardyń jazasyn aýyrlatyp, zańmen qýdalaýdy engizý, áıel quqyǵynyń qorǵalýyn kúsheıtý boldy. Qoldaryna plakat ustap alańǵa jınalǵan narazylyq bildirýshi toptyń basym kópshiligin áıelder qurady.
Foto: tengrinews.kz
Astana ákimdigi 17:00-19:00 ýaqyt aralyǵynda ótkizýge ruqsat etken mıtıngini Myqty.women bastamasynyń ókilderi uıymdastyrdy. Shara bir saǵattyń kólemindeı ýaqytqa sozyldy. Áleýmettik jelide taraǵan vıdeolarda jınalǵan top “Biz zat emespiz, tynysh ómir súrýimizge múmkindik berińder”, - dep urandatýda. Olardyń aıtýynsha, elimizde názik jandylardyń quqyǵy durys qorǵalmaıdy, óte kóp áıelder turmystyq zorlyq-zombylyqtyń qurbany, barlyǵyna kináli - zańsyzdyq.
Foto: tengrinews.kz
Aıta keteıik, Qazaqstanda turmystyq zorlyq-zombylyq zańy 2009 jyly qabyldanǵan. Al, 2022 jyly jumys toby turmystyq zorlyq-zombylyqtyń jazasyn kúsheıtetin zań jobasyn daıyndaǵan bolatyn. Biraq, bul ózgerister áli qabyldanbady.
"Adyrna" ulttyq portaly
