Belgili akter, Qazaqstannyń Halyq ártisi Tuńǵyshbaı Jamanqulov Arystanbek Muhamedıulymen bolǵan kıkiljiń týraly jasyrmaı aıtty. Bul týraly ol Nartaı Aralbaıulyna bergen suhbatynda aıtty, dep habarlaıdy “Adyrna” ulttyq portaly.
“Biz de et pen súıekten jaralǵan adambyz. Jasyrǵanym bolsa, “ózińe de sol kerek” deıtin edim, al munda naqaqtan jala jabylyp, “ne jazdym?” dep qapalandym. Qatty aýyrdym, qınaldym, aýrýhanaǵa tústim. Dárigerler meniń kúızelgenimdi kórip, ózderi terapııadan júıke aýrýyn emdeıtin bólimge aýystyrdy. Jyndyhanada 15 kúndeı jattym. Men emdelip jatqan kezde de tergeýshiler kelip tergedi. Olar maǵan qysym kórsetti. Maǵan kóp nárseni moıyndatpaq boldy”, – deıdi Halyq ártisi.
Sondaı-aq, akter Muhamedıulynyń alaıaqtyq isterin de jasyrmady.
“Men – akademııaǵa kelgen bilimgerlerdi qabyldaıtyn bólimniń jetekshisimin. Oqýǵa kelgen abıtýrıentter sany kóp. Bir orynǵa elý adamdaı talasady. Sonda maǵan “grantqa ilinýi tıis” dep 11 adamnyń tizimin berdi. Men munsha balany ala almaımyn, úlken, syıly adamdar suraǵan bolar, ary ketse, eki balany alaıyn dedim. Sóıtip túndeletip emtıhanymdy aıaqtap kele jatsam, “Sen nege meniń aıtqanymdy oryndamaısyń?” dep habarlasyp tur. Men jaǵdaıdy túsindirdim. Ýáde bergen eki adamdy aldym, tizimdegi balalar kóńilimnen shyqpady, erteń uıat bolatynyn aıttym. Sóıtsem, meni tyńdamaıdy. “Meni sen qurtamyn, shyǵaryp jiberemin. Sen kimsiń sonsha?” deıdi rektor. Sodan soń men de: “Birinshiden, maǵan “sen” dep sóıleısiń.
Ekinshiden, men seniń basybaıly qulyńmyn ba? Men Qazaqstannyń Halyq ártisi, professor Tuńǵyshbaı Jamanqulov degen aǵańmyn. Dikińdemeı sóz tyńdasaıshy” desem, qoımaıdy. “Men seniń ornyńa basqa bireýdi alamyn” dedi. Men de emoııanyń adamymyn. Telefonnyń arǵy jaǵynan "Ketshi bar na ..." dedim. Erteńgi kúni jaǵdaıdy túsindirmek bolyp akademııaǵa bardym. Rektor áli kelmepti. Bir ýaqytta kólikten túsip jatyr eken. Men bolǵan jaǵdaı týraly túsiniseıik dep usynys aıttym. Ózimdi kirgizbeı qoıdy. Birge kirip, kabınetińde sóıleseıik dedim. Amandyq-saýlyq joq, maǵan bir, analarǵa bir qarady da: “Mynany kirgizbeńder” dedi. Taǵy shymkentshe bir boqtadym da ketip qaldym”, – deıdi akter aǵynan jarylyp.
Akter men Arystanbek Muhamedıuly arasyndaǵy teketires osylaısha bastalǵan. Tuńǵyshbaı Jamanqulovtyń aıtýynsha, ol mınıstr bolǵan soń akter túsirmek bolǵan fılmderdi toqtatyp, qarjy bólmeı qoıǵan.
