Jastardy ádebıetke tartý úshin bizge myzǵymas ulttyq ıdeologııa men jetkilikti deńgeıde áleýmettik qamtamasyz etý de kerek dúr. Al, órkenıetti elderde bul jaǵdaılardyń barlyǵy da derlik qolǵa alynǵan. Áıtpese, aılyǵy shaılyǵyna jetpeı, páter jaǵalyp júrgen jastardyń áleýmettik jetispeýshilikten kóńilderi toqyrap, páter jaǵalap júrgende, olardyń ulttyń ádebıetine yqylasy da qandaı bolatynyn boljaý qıyn emes. Olardyń ishinde bizdiń stýdent jastarymyz da jeterlik. Páter jaldap, jumys tappaı júrgen jastardyń sany qanshama eken? Men bilmeımin, biraq tym kóp ekenin anyq bilemin. Onyń barlyǵyn biz ádebıetti oqýǵa tarta almaımyz. Biraq ulttyń ádebıetiniń qaınar bulaqtary bizdiń kitapqumar sanaly jastarymyzdyń sanasyna quıylsa, bul biz úshin kókten izdegenimiz jerden tabylǵany. Al, ony jasaıtyn ıdeologııa qaıda? Qarjylyq kómek qaıda? Ózimizdiń ana tilimizdi memlekettiń bıik minberlerinde sóılete almaı, shırek ǵasyrdan astam ýaqyttan beri áli ulardaı shýlap kelemiz. Qaıdan endi nátıje? Biz tek saldarmen ǵana kúresetin ultqa aınalyp kettik. Sebeptiń qaıda jatqanyn elemegennen soń osyndaı rýhanı daǵdarysqa ushyrap otyrmyz. Nege biz túpki sebebin bilip, aldyn ala almaı otyrmyz? Tipti bul jaǵdaı bizge úırenshikti bolyp qaldy. Biraz buryn da elge belgili aqsaqal ulttyń ádebıetin tiriltpeı, bizdiń rýhanı jańǵyrýymyz da, urandatqanymyz da beker degen bolatyn. Biz bulaı rýhanı jańǵyrmaı*aq qoıdyq... Sol sııaqty, ulttyq ádebıetti tiriltý de sheshilmegen qoǵamdyq-áleýmettik máselelermen tyǵyz baılanysty ekenin umytpaıyq... Qarnyńda bir nárse bolmasa, mıyńda ne bolmaq...
Bekbolat Qarjan
"Adyrna" ulttyq portaly
