Denıs Tenniń ólimine qatysty sottyń kezekti otyrysy tosyn málimdemelerge toly boldy. Ten tarabynyń qorǵaýshysy Nurlan Óstemirov kúdikti Janar Tolybaevaǵa qatysty jazany aýyrlatýdy surady. Advokat Janardyń qylmysqa tikeleı qatysy bar ekenin aıtyp, ony "Aldyn ala adamdar tobymen kelisip jasalǵan ólim" baby boıynsha kináli dep tabýyn surady.
"2018 jyldyń 25-shi sáýirinde 21-54-te Eýropaǵa shyǵys qońyraý bolǵan. Onyń qaıda jáne kimge xabarlasqanyn tekserýlerińizdi suraımyn. Nómirdiń basy +4-ten bastalady. Naqty aıtsaq bul - Shveıarııa. Shyǵys ta, kiris te qońyraý bolǵan. Sen qońyraý shaldyń, artynan saǵan qaıta xabarlasty.
Altynshy mamyr, 3-shi, 5-shi, 7-shi, 20-shi shilde kúnderi shyǵys ta, kiris te qońyraýlar bolǵan. Sońǵy qońyraý sen tastap jibergen sım kartadan boldy. Sen xabarlastyń biraq sosyn saǵan qońyraý shalmady.
Uıaly telefon qońyraýlaryna sáıkes men kelesi otyrysqa qarsy shaǵym túsirmekpin. Sebebi munda Denıstiń aınalasynyń qatysy bar. Atalǵan nómirler onyń aınalasyndaǵylardikimen sáıkes kelýde", - deıdi Oksana Ten.
Alaıda, Janar Tolybaeva Eýropaǵa qońyraý shalmaǵanyn aıtty.
"Ol Qyrǵyzstanǵa nemese Ózbekstanǵa bolýy múkin", - dep jaýap berdi kúdikti.
"Sáıkestik degen jaıdan jaı bolmaıdy. Pyshaq, qolǵap satyp alý degen. Bul - aldyn ala kelisip, tapsyryspen jasalǵan qylmys.
Bul oqıǵada men Tolybaevany basty uıymdastyrýshy dep esepteımin. Ol telefonmen sóılesip, nusqaýlyqtardy berip otyrǵan. Úsheýiniń ishindegi eń bilimdisi de sol. Onyń joǵarǵy bilimi bar. Aǵylshynsha jaqsy sóıleıdi. Ómirde maqsaty bar. Qudaıbergenov urlyqtyń arqasynda, Qııasov otbasynyń kómegimen kún kórip júr. Tutqa arqyly tapsyrmany osy Tolybaeva alyp otyrdy dep oılaımyn" , - dedi Óstemirov.
Jábirlenýshi taraptyń qorǵaýshysy Óstemirov, Janar Tolybaevanyń Denıs Ten ólimine tikeleı qatysy bar ekenin aıtyp, ony "aldyn ala kelisip jasalǵan adam ólimi" baby boıynsha kináli dep tanýdy surady.
"Adyrna" ulttyq portaly
