Shymkenttiń Abaı aýdanynda 322 myńnan astam halyq turady. Aýdandaǵy 34 eldimekenniń 33-i aýyz sýmen qamtylǵan, búgingi tańda 1 eldimekende qurylys jumystary aıaqtalýǵa jaqyn. Jyl sońyna deıin Abaı aýdanynyń halqy 100% taza sýmen qamtylady. Bul týraly aýdan ákimi Buharbaı Parmanov shahar basshysynyń halyqpen kezekti esep berý jıynynda aıtty.
«Byltyr «Jańatalap», «Yntymaq-2», «Aqtas-2», «Nurshýaq», «Jańa Turlan» eldimekenderine aýyz sý kirgizdik. Jyl sońyna deıin «Qursaıdaǵy» qurylys jumystary aıaqtalyp, abonentteý jumystary júrgiziledi»-dedi B.Parmanov.
Aýdan ákiminiń bergen málimetinshe, «Nurshýaq», «Jańatalap», «Batys» turǵyn alaptaryn elektr jaryǵymen qamtý jumystary bitýge jaqyn. Jańa jylǵa deıin 4366 tutynýshy sapaly elektr qýatyna qol jetkizedi.
Kógildir otynmen barlyq eldimekenniń 24-i qamtylǵan. Bıyl 7 nysanda qurylys qyrqyndy júrgizilýde. Kelesi jyly taǵy 3-de gaz tartý jumystary bastalady. Jalpy, Abaı aýdany 2024 jyly tolyq gazben qamtylatyn bolady.
«Infraqurylym qurylysy ár jylǵa kezeń-kezeńimen josparlanǵan. Halyqtyń birinshi kezektegi máselesin sheship berý – bizdiń mindetimiz. Qala basshysy M.Áıtenovtiń tikeleı qoldaýymen aldaǵy 2 jylda «Abaı» aýdany boıynsha sý, gaz, jaryq máselesi túbegeıli sheshiledi. Sabyr saqtap, berilgen ýádelerdiń oryndalýyn kútkenderińiz úshin halyqqa alǵysymdy bildiremin»-dedi aýdan ákimi.
Al «Samal-3» pen «Soltústik Batysqa» qazirgi ýaqytta káriz júıesi tartylýda, ol da aıaqtalýǵa jaqyn. Kelesi jyly «112 oramda» qurylys bastalady. Sóıtip bul másele 2025 jylǵa deıin 59%-ǵa sheshimin tabatyn bolady.
