Qos batyrǵa arnalǵan qos týrnır

2195
Adyrna.kz Telegram

«Adyrna» ulttyq-etnografııalyq birlestigi Almaty qalasy Ishki saıasat basqarmasynyń qoldaýymen stýdentter arasynda 1986 jylǵy jeltoqsan kóterilisiniń qaıratkerlerine arnalǵan 2 týrnır uıymdastyrdy.

Birinshi týrnır toǵyzqumalaqtan Qazaq bas sáýlet-qurylys akademııasynda ótti.  «Halyq qaharmany» Qaırat Rysqulbekovty eske alýǵa arnalǵan qaladaǵy jarysqa ártúrli JOO-lardan 20-dan astam stýdent qatysty. Týrnır nátıjesinde 1-oryndy M.Qurylys, 2-oryndy Á.Turlyǵul, 3-oryndy E.Qýanyshbaev ıelendi.

Ekinshi týrnır jeltoqsan kóterilisiniń taǵy bir qaıratkeri Erbol Sypataevty eske alýǵa arnaldy. Qazaqs Sport jáne týrızm akademııasynda qazaq kúresinen ótken jarysqa salmaǵy 80 kılogrammnan joǵary balýandar qatysty. Boz kilemde beldesken balýandar jarysynda K.Orynbasar 1-oryn alsa, 2-oryndy M.Berdiǵalı enshiledi, 3-oryndy N.Ońalbaı qanjyǵasyna baılady.

«Adyrna» ulttyq-etnografııalyq birlestiginiń dırektory Arman Áýbákirdiń aıtýynsha eki týrnırdiń de ulttyq sport túrlerinen ótkizilýiniń ózindik sebebi bar.

«Bizdiń uıym 10 jyldan beri ulttyq-etnografııalyq baǵytta jumystar atqaryp keledi. Sondyqtan únemi is-sharalardyń ulttyq qyryna basymdyq beremiz. Almaty qalasy Ishki saıasat basqarmasymen tapsyrmasymen birneshe jobalardy júzege asyryp jatyrmyz. Solardyń biri 1986 jylǵy jeltoqsan qatysýshylaryna arnalǵan «Patrıottyq rýh – basty qundylyq» jobasy. Toǵyzqumalaq pen qazaq kúresinen ótip jatqan týrnırler osy joba aıasynda uıymdastyrylyp otyr», deıdi ol.

Eki týrnırdiń de jeńimpazdary medaldarmen baǵaly syılyqtarmen, arnaıy dıplomdarmen marapattaldy.

 

B.Ospan

Pikirler