Keshe Astanada órtten úsh adamdy qutqaryp qalǵan órt sóndirýshi qazir komaǵa jatyr. Onyń denesiniń 80% paıyzyn kúıik shalǵan. Bul týraly Batyrjan Ibragım esimdi azamat óziniń feısbýk paraqshasynda habarlady, dep jazady "Adyrna" ulttyq portaly.
"Duǵada bolsańyzdar. Órtten úsh adamdy qutqaryp, qazir ózi komada jatyr. Denesiniń 80% paıyzyn kúıik shalǵan eken. Qazir jaǵdaıy óte aýyr. Batyr jigittiń esimi Asqar. Órt sóndirý qyzmetinde jumys isteıdi. Úıinde kelinshegi men eki kishkentaı balapandary barsha qazaq elinen tek duǵa etińizdershi dep surap otyr. Aman bolsynshy. Ol úıdegi órtke joǵarǵy qabattan kirý úshin qorǵanysh kıimin sheship, tek dem alý apparatyn ǵana alǵan. Úıden 80 jastaǵy ájeni, 22 jastaǵy nemeresin jáne kórshi páterde balkonǵa tyǵylyp qalǵan 10 jasar balany órtten aman alyp qalǵan. Asqar búgingi kúnniń batyry. Alladan amandyǵyn suraıyqshy. Qazir kelinsheginiń qolynda Asqardyń saǵaty ǵana qaldy. Asqardyń ómir saǵaty toqtamasyn dep tileıikshi. Bári jaqsy bolsyn", - dep jazdy ol.
Esterińizge sala keteıik, keshe saǵat 10:43-te órt sóndirý bólimshesine Baýyrjan Momyshuly dańǵyly, 14 meken-jaıyndaǵy 15 qabatty úıdiń 11-shi qabatyndaǵy páterden órt shyqqany týraly habarlama kelip túsken. Alapat órtten 5 adam, onyń ishinde bir bala qutqarylyp, 10 adam evakýaııalandy. Kómirtegi totyǵymen ýlanǵan úsh adam, onyń ishinde bir bala aýrýhanaǵa jetkizildi.
"Adyrna" ulttyq portaly
