Almatyda Almaty Museum of Arts zamanaui öner muzeiınıŋ tanystyrylymy öttı
Almatyda Almaty Museum of Arts zamanaui öner muzeiınıŋ tanystyrylymy öttı. Is-şaraǧa Qazaqstan Respublikasynyŋ Mädeniet jäne aqparat ministrı Aida Balaeva, Almaty qalasynyŋ äkımı Darhan Satybaldy, käsıpker ärı mesenat Nūrlan Smaǧūlov, qazaqstandyq jäne şeteldık mädeniet qairatkerlerı, sondai-aq, 30-dan astam halyqaralyq basylym ökılderı qatysty.
Jiynda söz alǧan mädeniet jäne aqparat ministrı būl auqymdy jobanyŋ jüzege asyryluy Qazaqstannyŋ mädeni ärı ruhani ömırındegı maŋyzdy oqiǧa ekenın atady.
«Memleket basşysy Qasym-Jomart Toqaev Joldauynda bügıngı jas ūrpaq dästürlı qūndylyqtarmen qatar, jaŋaşyldyq pen jasampazdyqty da patriotizmnıŋ basty negızı retınde köretının aitqan bolatyn. Osy tūrǧyda jaŋa muzei dästür men jaŋaşyldyqty ūştastyratyn, Qazaqstan men Ortalyq Aziia mädenietın şetelge paş etetın alaŋǧa ainalady», – dedı Aida Balaeva.
Jaŋa mädeni orda halyq üşın 12 qyrküiekten bastap aşylady. Muzei 56 mlrd 160 mln teŋge jeke investisiia esebınen boi kötergen. Jalpy aumaǧy 10 060 şarşy metr bolatyn qūrylys ekı qiylysqan ǧimarattan tūrady. Bır mezette 500 qonaq qabyldai alatyn keŋıstık britandyq säuletşılerdıŋ jobasymen jasalyp, tabiǧat pen qala körınısterımen üilesedı. Zamanaui talaptarǧa sai jabdyqtalǧan ǧimarat öner tuyndylaryn saqtauǧa, körsetuge jäne qalpyna keltıruge qajettı barlyq jabdyqpen qamtylǧan.
Körme zaldary Qazaqstannyŋ mädeni mūrasy men tabiǧi bailyǧyn därıpteumen qatar, qazaqstandyq jäne älemdık zamanaui suretşılerdıŋ tuyndylaryna arnalǧan.
Almaty qalasynyŋ äkımı Darhan Satybaldy qūttyqtau sözınde būl muzeidıŋ aşyluyn qalanyŋ jan-jaqty damuynyŋ belgısı dep atady.
«Almaty – elımızdıŋ mädeni ortalyǧy. Mūndai keşennıŋ aşyluy – qalamyz üşın erekşe oqiǧa. Būl jastardyŋ kreativtı oilauyn damytuǧa, olardyŋ mädeniet salasynda özın synap köruge yqpal etedı. Sonymen qatar Almatynyŋ turistık jäne ekonomikalyq äleuetın de jaŋa deŋgeige köteredı», – dedı qala äkımı.
Muzeidıŋ negızın belgılı qazaqstandyq käsıpker ärı mesenat Nūrlan Smaǧūlov qalaǧan. Ol özınıŋ jeke qorynan Qazaqstan, Ortalyq Aziia jäne özge de el suretşılerınıŋ 700 tuyndysyn muzeige syiǧa tartty.
Jaŋa öner ordasy halyqaralyq deŋgeidegı jobalardy, uaqyt ozǧan saiyn jaŋaryp otyratyn körmelerdı, bılım beru baǧdarlamalaryn, şeberlık därısterın, käsıbi qor saqtau men restavrasiia şeberhanasyn, sondai-aq kıtaphanany qamtityn zamanaui mädeni ortalyq retınde qalyptaspaq.
Körıktendırılgen 5 000 şarşy metrlık aumaqta aşyq aspan astyndaǧy müsınder, subūrqaqtar men demalys oryndary ornalasqan.
