Elimiz boıynsha BAQYLA qozǵalysy 5 myńnan astam baqylaýshyny júıeli oqytyp, arnaıy ýchaskelerge joldady. 20 qarashada ótken kezekten tys prezıdent saılaýynda saılaý proesin baqylaýǵa aralasyp, respýblıka boıynsha 27 qala men eldi-mekendi qamtı aldy.
Buǵan deıin Ortalyq saılaý komıssııasy Qazaqstan boıynsha 10 myńnan astam saılaý ýchaskeleri bar ekenin málimdedi. Biz sonyń 3,2 myńǵa jýyq ýchaskesin, ıaǵnı 30 paıyzyn qamtı aldyq dep aıta alamyz.
Saılaý proesi biz kútkendeı tartysty ótpedi. Óıtkeni Toqaevtan basqa úmitkerlerdiń tanymaldyǵynyń tómen bolýy ári naýqan barysynda júrgizgen úgit-nasıhattyń osaldyǵy sebep boldy degen pikirdemiz. Oǵan qosa, saılaý naýqany eki aıǵa jýyq ýaqytqa sozylǵanyna qaramastan, saılaýshylar keıbir úmitkerlerdiń esimin jattap ta úlgermedi.
Úmitkerler arasynda kúres qyzý shyqpaǵan soń, saılaý kúni baqylaý proesi de asa tartysty bolmady. Úmitkerlerge qatysty daýys sanaýdy burmalaýdyń qajettiliginiń joqtyǵynan da bolar, ótken saılaýmen salystyrǵanda zań buzýshylyq ta azyraq tirkeldi.
Baqylaýshylardy saılaý ýchaskelerine kirgizbeı, olarǵa hattama bermeı, ýaqytynan buryn shyǵaryp jiberýge tyrysý boıynsha ondaǵan faktiler tirkeldi. Osyndaı zań buzýshylyqtardyń kóbi saılaý ýchaskesinde sheshildi.
Biz azamattyq qoǵamnyń qalyptasyp, bekı túsý úshin saılaýdy baqylaý mańyzdy ról atqarady dep sanaımyz. Aldaǵy kezekten tys Parlament saılaýy kezinde de baıqaýshylar ınstıtýtyn nyǵaıtýǵa barynsha atsalysamyz degen nıettemiz.
Dos KÓShIM: «Baqylaýshylardy daıyndaý úshin qashyqtan oqytý arqyly qazaq jáne orys tilderinde birneshe trenıng ótkizildi. Oǵan BAQYLA qozǵalysyna kiretin úkimettik emes qoǵamdyq birlestikterdiń oblystyq, qalalyq deńgeıdegi trenerleri qatysty. Qatysýshylardyń suraqtaryna jaýap berilip, trenıngterdiń elektrondy jazbasy barlyq óńirlerge taratyldy. Olar biz daıyndaǵan «Baqylaýshy dápteri» negizinde júrgizildi.
Dınara ÓMIRZAQOVA, Petropavl qalasy: «Biz BAQYLA-ny halyq arasynda tanytý jumystaryn júrgizdik, sonyń arqasynda qatarymyz tolyp, belsendilerdi oqyttyq. Baqylaýshylardyń jasy 19-dan bastaldy, kóbisi 30-dan asqan. Qalamyzda 84 saılaý ýchaskesi bar, barlyǵyn qamtydyq. Bul bizdiń alǵashqy tájirıbemiz. Biz saılaýdyń ádil ótkenin qaladyq, sol úshin baıqaýshy boldyq.
Baqytjan BUQARBAI: «Baıqaýshylar saıası tartys bolǵan jerde ǵana pisedi. Ókinishke qaraı, bıylǵy saılaý básekeli bolmady. Qalaı bolsa da, belsendi azamattardyń yntasyn óshirip almaý kerek, sol sebepti bıylǵy baıqaýshylyqtyń bir ereksheligi – azamattyq qoǵam men saılaýdy baqylaý mańyzy týraly, saılaý kezinde bolatyn jaǵdaılardy taldap beretin kóptegen dárister oqyldy».
Aslan ZÝLKAShEV, Aqtóbe qalasy: «Men mektep kezinen beri belsendi bolýǵa umtyldym. Óskende kásip ashtym, blog júrgizip, aýdıtorııamdy keńeıttim. Saıası úrdiske aralasyp, sol arqyly da elimizge paıdamdy tıgizgim keldi. Aqtóbe halqy naýqanǵa belsendi aralasady dep kútpedim. Biraq adam jınaýda esh qıyndyq kórmedik. Aramyzda tájirıbeli baqylaýshylar da boldy. Jumys barysynda bir-birimizge dos bop kettik.
Erlan ÓMIRJANULY, Semeı qalasy: «Baıqaýshynyń maqsaty ne?» degen suraqtyń jaýaby – ádil saılaýdyń ótýin baqylaý. Biz osyny jastarǵa jetkizgimiz keldi, óıtkeni kóbisi munyń mańyzyn bile bermeıdi, bilse de beıqam qaraıdy».
