Memleket basshysy Qasym-Jomart Toqaev «Bilim berý júıesindegi ótkir problemanyń biri- mektepterdegi oryn tapshylyǵy», degen edi. Prezıdent atalǵan máseleni sheshýge shuǵyl shara qabyldamasaq, 2025 jylǵa qaraı oryn tapshylyǵy 1 mıllıonǵa jetetindigin aıtqan bolatyn, dep jazdy « Adyrna» tilshisi.
«Men 2025 jylǵa deıin keminde 800 mektep salý týraly tapsyrma bergen bolatynmyn. Búgin onyń sanyn bir myńǵa jetkizýdi mindetteımin», - dedi Prezıdent Qasym-Jomart Kemeluly.
Búgingi kúni Memleket basshysynyń mektepterdegi oryn sanynnyń azdyǵyn azaıtý týraly tapsyrmasyn oryndaý isi Almaty qalasynda qarqyn alǵan. Bul týraly shahar ákimi Erbolat Dosaev Naýryzbaı aýdany halqymen kezdesýi barysynda aıtty.
Almaty qalasyna qaratsy aýdanda oqýshy oryndarynyń tapshylyǵyn azaıtý maqsatynda birqatar jumystar atqarylýda.
Máselen, jańa oqý jylyna 2 mektep, onyń ishinde: Qalqaman shaǵynaýdanynda 1 800 oryndyq jáne Qarǵaly shaǵynaýdanynda 600 oryndyq jeke menshik mektep ashyldy.
"Jyl sońyna deıin taǵy 2 mektep ashylady. Atap aıtqanda, qarasha aıynda Qalqaman shaǵynaýdanynda 1 500 oryndyq jáne jeltoqsanda «Alma Sıtı – 5» aýmaǵynda 1 200 oryndyq mektep ashylady", - dep málimdedi ákim.
Sonymen qatar Shuǵyla shaǵynaýdanynda Qazaq Stroy kompanııasy «Álem Sıtı» (daıyndyǵy - 60%) jáne «Alma Sıtı – 4» (10%) aýmaǵynda 2 400 oryndyq 2 mektep salyp jatyr. Qurylys 2023 jyldyń III-toqsanynda aıaqtalady.
"Jyl sońyna deıin Shuǵyla shaǵynaýdanynda № 174 mektepke 375 oryndyq qosymsha qurylystyń jobalaý-smetalyq qujattamasy aıaqtalyp, memlekettik saraptamaǵa jiberiletin bolady. Saraptama qorytyndysy shyǵyp, konkýrstyq proedýralar aıaqtalǵannan keıin 2023 jyldyń II-toqsanynda qurylysyn bastaý josparlanǵan", - dedi megapolıs basshysy.
Quramys shaǵynaýdanyndaǵy 1 500 oryndyq jáne Shuǵyla shaǵynaýdanyndaǵy 2 000 oryndyq 2 mekteptiń jobalaý-smetalyq qujattamasy ázirlenip, 2023 jyldyń I-toqsanynda memlekettik saraptamaǵa jiberiledi. Qurylysy 2023 jyldyń III-toqsanynda bastalady.
Sondaı-aq Shuǵyla shaǵynaýdanyndaǵy eski №15 mektep-ınternat jáne «Nurly dala» turǵyn úı kesheniniń aýmaǵyndaǵy 2 mekteptiń jobalaý-smetalyq qujattamasyn ázirleýge konkýrs jarııalaý úshin qujattama daıyndalyp jatyr.
