Prezıdent saılaýynyń kúzde bolýy aldyn-ala uıymdastyrylǵan ba? Bul suraqqa Qazaqstan Parlamenti Májilisiniń tóraǵasy Qoshanov Erlan Jaqanuly jýrnalıst Nartaı Aralbaıulynyń ıýtýb arnasynda aıtyp berdi, dep habardaıdy “Adyrna” ulttyq portaly.
“Kútpegen jaǵdaı desek senbeısiz. Memlekettiń taǵdyryna qatysy bar iri sheshimder atústi qabyldanbaıdy ǵoı. Sondyqtan prezıdent ózine qajetti degen adamdarmen aqyldasady. Oılanyp-tolǵanyp sheshim qabyldaıdy. Biraq sheshimdi ózi qabyldaıdy. Sondyqtan prezıdent saılaýy syn-qaterlerdi eskergen sheshim dep oılaımyn. Bul-birinshiden. Al ekinshiden, keıbir sheshimder tez qabyldanady. Bul prezıdenttik saılaý zerttelgen, jan-jaqtan qamtylǵan sheshim”,- dedi Májilis tóraǵasy.
Sondaı-aq, ol “Qańtar oqıǵasy” týraly da aıta ketti.
“Qańtar oqıǵasy” bizdiń memleketimizde jyldar boıy jınalǵan saıası máseleniń bar ekenin kórsetti. Soǵan jaýap retinde prezıdent saıası reformalar jarııalady. Ony halyq bolyp qoldady. Bul “Qańtar oqıǵasy” ishimizde bolyp jatqan syn-qaterlerge berilgen jaýap boldy. Al endi syrttan keletin qaýip-qater joq emes. Qazir Qazaqstan aınalamyzda laýlap janyp jatqan turaqsyzdyqtyń ishindegi turaqtylyq sekildi bolyp tur. Ony kóre almaıtyndar da bar. Ot tastap otyrǵandar sonyń dáleli. Sondyqtan munyń barlyǵyn boldyrmas úshin prezıdent syrtqy saıasatty belsendi júrgizip otyr”,- dedi Erlan Jaqanuly.
