Qazaqstan halqynyń tilderi kúni merekesi qarsańynda QR Ulttyq kitaphanasynda «Ulttar birligi – uly baılyq» atty shyǵarmashylyq festıval uıymdastyryldy. Atalǵan is-sharany «Adyrna» ulttyq-etnografııalyq birlestigi Qazaqstan halqy Assambleıasymen birlese otyryp Almaty qalasy Ishki saıasat basqarmasynyń qoldaýymen ótkizdi.
Qazaqstan halqynyń birligi urany negizinde «Birlik – bereke bastaýy» atty jobanyń aıasynda ótken festıval barysynda etnoaýyl kórmesi uıymdastyryldy. Kórmege etnomádenı ortalyqtardyń ókilderi ulttyq naqyshta bederlengen buıymdaryn qoıyp, ulttyq taǵamdaryn kópshilikke usyndy. Sondaı-aq, etnomádenı birlestikterdiń shyǵarmashylyq ujymdarynyń qoıylymy kórsetilip, ózge ult jastary arasynda «Til – tatýlyq tiregi» atty baıqaý bolyp ótti. «Adyrna» ulttyq-etnografııalyq birlestiginiń dırektory Arman Áýbákirov: «Memleketimizdiń negizgi tiregi – qazaq ulty. Qazaqtyń mádenıetin, ulttyq qundylyqtaryn nasıhattap, elimizde turyp jatqan ult ókilderin qazaq etnosy aıasynda biriktirý maqsatynda osy shara ótkizilip otyr. Osyndaı jumystardyń negizinde elimizde tatýlyqty, birlikti, dostyqty saqtaı alamyz jáne bir-birimizge degen syılastyqtyń, yntymaqtyń qalyptasýyna osyndaı festıvaldar, baıqaýlar sebepshi bolady dep oılaımyn, - dedi. Baıqaýdyń shymyldyǵy Chaıkovskıı atyndaǵy mýzyka kolledji stýdentteriniń ónerimen ashyldy. Saıysqa qatysýshylardy Ahmet Baıtursynov atyndaǵy Til bilimi ınstıtýtynyń dırektory, fılologııa ǵylymdarynyń doktory, qazylar alqasynyń tóraǵasy Erden Qajybek quttyqtap, sáttilik tiledi. Baıqaýǵa Erden Qajybek, Almaty qalasy Tilderdi damytý basqarmasynyń bas mamany Nurmuha Shaımerdenov, Temirbek Júrgenov atyndaǵy Qazaq ulttyq óner akademııasy «Teatr óneri» fakýlteti, «Sahna tili» kafedrasynyń doenti Aıgúl Naremgenova, «Ulan» gazetiniń bas redaktory Jadyra Narmahan, «Qamshy» aqparattyq agenttiginiń jetekshisi Bilál Qýanysh tórelik etti. Saıysqa ózbek, orys, túrikmen, aýǵan, tájik, kúrd, uıǵyr, túrik, nemis ultynan 15 pen 30 jas aralyǵyndaǵy 10 talapker qatysyp, 3 kezeń boıynsha synǵa tústi. Birinshi kezeń boıynsha bıyl 125 jyldyǵyn atap ótip otyrǵan Alash qaıratkeri, aqyn Maǵjan Jumabaevtyń ólenderin jatqa oqý, ekinshi kezeń boıynsha «Ulttardy uıystyrǵan qazaq halqy» taqyrybynda esse oqý, úshinshi kezeń boıynsha óz ónerlerin kórsetý tapsyryldy. Qatysýshylardyń barlyǵy memlekettik tildi jetik biletinderin kórsetti. Qazaq tilinde taza sóılep, oılaryn erkin jetkize bilgen olar óz ónerlerin ortaǵa saldy. Baıqaý qorytyndysy boıynsha qazylar alqasynyń sheshimimen birinshi oryndy orys ultynyń ókili, QR Ulttyq Ulan qyzmetkeri Aleksandr Mamykın jeńip aldy. Upaı sany boıynsha alǵa shyqqan Aleksandr noýtbýkke ıe boldy. Ózbek qyzy, qazaq memlekettik qyzdar pedagogıkalyq ýnıversıtetiniń stýdenti Ferýza Sultanmuratova ekinshi oryndy qanaǵat tutyp, planshet ıelendi. Al úshinshi oryn túrik qyzy Rýsalına Asıevaǵa buıyryp, fotoappa- rat berildi. Rýsalına baıqaýdyń eń jas qatysýshysy boldy. Jasy nebary on beste. 9-shy synypty qyzyl attestatpen aıaqtap, 10-shy synypqa kóshipti. Almatydaǵy №22 mekteptiń qazaq synybynda oqıdy. Anasy Farıda Asıeva qyzyn alǵashynda orys mektebine bergenin aıtady. Alaıda Rýsalına qazaqsha oqıtynyn aıtyp, qıǵylyq salǵan soń qazaq synybyna aýystyrǵan eken. Sodan beri túrik qyzy túrli baıqaýlarǵa qatysyp, top jaryp keledi. Óziniń ana tilimen qosa qazaq, orys, aǵylshyn tilderinde erkin sóıleıdi. «Mektepte alǵan bilimim, ata-anamnyń bergen tárbıesi, atamnyń ónegeli aqylynan meniń elime degen súıispenshiligim arta tústi. Osynda týyp-óskenime, memlekettik tilde sóılep, bilim alyp jatqanyma maqtanamyn. 9-shy synypty altyn attestatpen bitirgenime qýanamyn jáne 11-shi synypty da «Altyn belgige» bitirip, Astanadaǵy Nazarbaev ýnıversıtetinde bilim nárimen sýsyndap, elime paıdasy tıetin mamandyq ıesi bolǵym keledi. Otanymyz – Qazaqstannyń árdaıym birlik pen tynyshtyqta ómir súrgenin qalaımyn», - dedi Rýsalına Alıeva. Baıqaýǵa qatysqan barlyq qatysýshylar alǵys hatpen jáne baǵaly syılyqtarmen marapattaldy. Is-sharaǵa Qazaqstan halqy Assambleıasynyń músheleri, ulttyq ıntellıgenııa, BAQ ókilderi, stýdentter men oqýshylar qatysty.
Aına TÓLEÝTAEVA
