Shymkentte 6 emhana, 1 perzenthana salynbaq

572
Adyrna.kz Telegram

«Abaı aýdanyna qarasty 34 eldi mekenniń 33-i sapaly aýyzsýmen qamtylǵan. Al, elektr jaryǵy 31 eldi mekende tolyq júrgizilgen. Jyl sońyna deıin Abaı aýdanyna qarasty eldi mekenderdi 100 paıyz aýyz sýmen jáne elektr jaryǵymen qamtý kózdelip otyr». Bul týraly búgin Shymkent qalasy máslıhatynyń kezekti jıyrma birinshi sessııasynda Abaı aýdanynyń ákimi B.Parmanov málimdedi.

Sessııada Shymkent qalasy máslıhatynyń depýtattary kún tártibindegi 22 máseleni qarap, tıisti sheshimderdi qabyldady. Shymkent qalasy ákiminiń orynbasary M.Isahov qatysqan jıynǵa Shymkent qalalyq máslıhatynyń hatshysy B.Narymbetov tóraǵalyq etti.
Sessııa barysynda «2022-2024 jyldarǵa arnalǵan Shymkent qalasynyń bıýdjeti týraly» Shymkent qalasy máslıhatynyń sheshimine birqatar ózgerister engizildi. Sonymen qatar, qalaǵa qarasty Abaı, Ál-Farabı, Eńbekshi, Qarataý aýdany ákimderiniń esebi tyńdaldy. Al, Shymkent qalalyq densaýlyq saqtaý basqarmasynyń basshysy N.Asylbekov salany damytý josparymen tanystyrdy.
— Shymkent qalasy boıynsha 13 memlekettik emhana 600 myńnan astam turǵynǵa qyzmet kórsetse, 31 jekemenshik emhanada 507 myń tirkelgen. Alaıda, 2025 jylǵa deıin qalaǵa 6 emhana kerek dep qarastyrylyp otyr. Bul emhanalardyń qurylysyna ınvestıııa tartý jumystary júrgizilýde. Sonymen qatar, respýblıkalyq bıýdjet esebinen 2025 jylǵa deıin 200 tósek-oryndy perzenthana salý máselesi de qaralyp jatyr, - dep atap ótti qalanyń bas dárigeri.
Sessııada, sondaı-aq, «Shymkent qalasy boıynsha jerleýdiń jáne zırattardy kútip ustaý isin uıymdastyrýdyń qaǵıdalaryn bekitý týraly», «Shymkent qalasynda janýarlardy aýlaýdyń, ýaqytsha ustaýdyń jáne jansyzdandyrýdyń qaǵıdalaryn bekitý týraly», «Shymkent qalasynyń aýmaǵynda janýarlardy asyraý qaǵıdasyn bekitý týraly» sheshimderge ózgerister engizildi.
Aıta keteıik, bul joly sessııaǵa qatysqan 29 depýtattyń 3-ýi onlaın qatysý múmkindigine ıe boldy. Aldaǵy sessııalarda 5 depýtatqa deıin qashyqtan qatysýǵa ruqsat berilmek.

Pikirler