«Aqtóbe» oıynshysy Álibek Qasym Sýperkýboktegi jeńilis úshin jankúıerlerden keshirim surady, dep habarlaıdy "Adyrna" ulttyq portaly 1bol.kz-ke siltep.
Fýtboldan Qazaqstan Sýperkýboginde «Aqtóbe» men «Qaırat» komandalary kezdesip, almatylyqtar 2:0 esebimen jeńiske jetti. Match «Astana Arenada» ótti.
Birinshi taımda eki komanda da esep asha almaǵanymen, ekinshi taımda «Qaırat» jaýapsyz eki gol soǵyp, kezekti ret Sýperkýbok ıegeri atandy.
«Aqtóbe» qorǵaýshysy Álibek Qasym jankúıerlerden keshirim surady.
"Búgin óte tartysty oıyn boldy. Biraq, ókinishke qaraı, jeńilip qaldyq. Bizdi qoldap kelgen jankúıerlerge alǵysymdy bildiremin jáne olardan keshirim suraımyn" – dedi fýtbolshy.
58-mınýtta Elder Santana komandalasynyń bergen pasyn sátti paıdalanyp, esep ashty. 61-mınýtta «Qaırat» oıynshysy Erkin Tapalov alańnan qýyldy. Biraq san basymdyǵyn paıdalanǵan «Aqtóbe» esepti teńestire almady. 86-mınýtta Santana pas berip, Gromyko ekinshi goldy soǵyp, oıynnyń núktesin qoıdy.
Osylaısha, «Qaırat» kezekti ret Qazaqstan Sýperkýbogin jeńip aldy.
