Shymkent qalasynyń Saıram turǵyn alabynda QR Prezıdentiniń Joldaýyn júzege asyrý, túsindirý boıynsha aqsaqaldarmen kezdesý ótti. Is-sharany «Amanat» partııasy Shymkent qalasy Qarataý aýdandyq fılıaly uıymdastyrdy.
Saıasattanýshy, M.Áýezov atyndaǵy OQÝ «Saıasattaný» kafedrasynyń meńgerýshisi Sáken Májinbekov Joldaýdaǵy basym baǵyttardy, memlekettik basqarý salasy, jańa ekonomıkalyq saıasat, kásipkerlikti damytýdaǵy jańa ózgeristerdi atap berdi.
Sáken Aralbaıuly endigi rette qaıta óńdeý óndirisi, adamı kapıtaldy damytý, sanaly urpaq tárbıeleýge nazar aýdarý qajettigin aıtyp, óz oılarymen bólisti.
– Qazir naryq zamany. Ár adam ózin damytyp, básekege qabiletti bolsa ǵana, jetistikke jetedi. Búginde kásippen aınalysýǵa, sanaly urpaq tárbıeleýde barlyq múmkindik bar. Prezıdent Joldaýynyń ón boıy ekonomıkalyq máselelerge arnalǵan. Halyqtyń ál-aýqatyn kóterý, barynsha halyqqa jaǵdaı jasaý kózdelip otyr. Ult qýatty bolsa, ult sapasyn jaqsarta alsaq, qoǵam ornyqty damıdy, – dedi S.Májinbekov.
El birligi – eń basty qundylyq. Qazirgi jahandaný dáýirinde ult bolyp uıysýdyń ózektiligi arta tústi. Saıram turǵyn alabynyń tóbe bıleri, turǵyndary Joldaýdy júzege asyrýda birlese uıymshyldyq tanytýǵa shaqyrdy.
