Qazaqstannyń ádiletti memleket bolýynyń negizin quraýshy býyn – jastar. Sondyqtan bolar Memleket basshysy «Ádiletti memleket. Birtutas ult. Berekeli qoǵam» atty Joldaýynda jastardy qoldaıtyn bastamalarǵa kóbirek mán berdi. Búgin Shymkent qalasyndaǵy Jumabek Táshenov ýnıversıtetinde «Amanat» partııasynyń Shymkent qalalyq fılıaly Atqarýshy hatshysynyń orynbasary Muratáli Qalmuratov stýdenttermen kezdesýinde Joldaýdy júzege asyrý tóńireginde pikirlesti.
Joldaýynyń úshinshi baǵytynda jas urpaqtyń densaýlyǵyn nyǵaıtý, sapaly bilim alýy men jumyspen qamtý jáne jas kásipkerlerdi qoldaý jóninde aıtylǵan. Kezdesý barysynda Muratáli Orazalyuly Memleket basshysy jastarǵa kóp úmit artyp otyrǵanyn, ádiletti qoǵam qurýda jas býynnyń róli úlken ekenin jetkizdi.
–Damyǵan elderdiń tarıhyna úńilseńiz aldymen jastarǵa kóbirek kóńil bólip, olardyń sanaly tárbıe men sapaly bilim berýdi qolǵa alǵanyn baıqaımyz. Prezıdentimiz Qasym-Jomart Kemeluly Jańa Qazaqstandy qurýda jas býynǵa úmit artqany Joldaýda aıqyn kórinis tapty. Qazir joǵary oqý ornyn aıaqtaǵan jas túlekterdi jumysqa ornalasý máselesi alańdatatyny ras. Jastarǵa jan-jaqty qoldaý memleketimizdiń basty mindetteriniń biri ekenin aıtyp, kelesi jyly 100 myń jastyŃ jumyspen qamtylatynyn jetkizdi. Jas kásipkerlerge qoldaý kórsetý maqsatynda olarǵa jeńildetilgen tártippen 2,5 paıyz bolatyn shaǵyn nesıe beriletinin málimdedi. Aldaǵy ýaqytta elimizdegi shaǵyn bızneste jastardyń tyń bastamalarymen jańa deńgeıge kóteriletinine nyq senimdimin. Berekeli qoǵamnyń bastaýy, ádiletti memlekettiń negizi de jastar, - dedi ol.
Aıta ketsek, búginde jastarmen birlese Prezıdent Q.Toqaevtyń Joldaýyndaǵy mańyzdy máselelerdi iske asyrý jóninde túrli is-sharalar uıymdastyrylýda. Mundaı pikirlesý alańy qala jastary arasynda memleket tarapynan jasalatyn múmkindikterdi tereń nasıhattaýǵa jol ashady.
