Qoǵam belsendisi, jýrnalıst Arman Shoraev Ýkraınanyń "Freedom UA" telearnasynda Qazaqstanǵa qashqyndardyń kóptep kelýine baılanysty suhbat berip, pikir bildirdi, dep habarlaıdy "Adyrna" ulttyq portaly.
"Ókinishke qaraı, Qazaqstannyń Reseımen shekarasy álemdegi eń uzyn shekara sanalady. Barshańyzǵa belgili, Reseıde qazaq jerin ózderine tıesili sanaıtyn azamattar bar. Bizdiń jerge kóz tigip, ony ózderiniń tarıhı otany sanaıdy. Ýkraınadan keıin Qazaqstanǵa basyp kiremiz degendi aıtady. Eger, shynymen de, 3 kúnde Kıevti, 7 kúnde Ýkraınany basyp alsa, keleside bizdiń Soltústik Qazaqstanǵa baǵyt buratyn edi. Alaıda, júrek jutqan Ýkraına sarbazdarynyń arqasynda bizdiń aspanymyz ashyq", - dedi Shoraev.
"Qazaqstanǵa kelgen reseılikter ózderiniń ımperııalyq jalań kózqarastaryn tanyta bastady ma?" degen jýrnalıstiń saýalyna Arman Shoraev:
" Ázirge ondaı eshteńe baıqalǵan joq. Biraq Reseıden kelgenderdiń súıikti isi spırttik ónimderdi ishý ekendigi belgili. Olar spırttik ónimderdi dúkennen alady da, el-jurttyń kózinshe iship otyra beredi. Bul bizdiń qoǵamǵa jat. Bizdiń bir bloger olarǵa "Qyrym kimge tıesili?" degen saýal qoıdy. Olar bulǵaqtap, túlkibulańǵa salyp, Qyrym, Donbas, Lýgansk degender Donbas, Lýgansk respýblıkalaryna tıesili dep jaýap berip jatty. Osylaı ún-túnsiz separatıstik qadamdardy qoldaıtyny kórinip qalyp jatyr. Qazirgi Qazaqstan 2013 jylǵy Ýkraına sekildi. Basshylyqta da, áskerılerdiń arasynda da separatıster kóp. Ásirese, soltústik jáne shyǵys Qazaqstanda slavıan turǵyndary jetip artylady", - dedi qoǵamdyq belsendi.
Baǵdarlama barysynda Arman Shoraev Reseıden aǵylǵan qashqyndarǵa qatysty óz pikirin aıtty.
"Meniń qashqyndarǵa eshqandaı janym ashymaıdy. Buǵan Pýtınniń fashıtik rejımin qoldaǵan reseılikterdiń barlyǵy kináli. Únsiz qalǵandar da áskerde jazyqsyz ólip, qyrylǵandardyń qanyn arqalaıdy. Biz olarǵa barlyq jerde "Sender bul jerde ýaqytsha júrsińder! Senderge ýkraınalyqtardyń rıza emes bolǵany sekildi qazaqtyń jerinde de eshkim rıza emes" dep aıtyp jatyrmyz, - dep jaýap berdi.
Óziniń prınıpshildigi jáne nyq ustanymymen qoǵamdyq pikir jetekshisine aınalǵan Arman Shoraev sóz sońynda Reseıdiń bul qarqynmen kete beretin bolsa, ishinen irip, túbi quldyraıtynyn atap ótti.
"Adyrna" ulttyq portaly
