Almaty qalasy Ishki saıasat basqarmasynyń qoldaýymen «Adyrna» ulttyq-etnografııalyq birlestigi «Tarıhtan taǵylym» jobasy aıasynda, Saıası qýǵyn-súrgin jáne asharshylyq qurbandaryn eske alý maqsatynda Almaty qurylys jáne halyqtyq kásipshilik kolledjinde Ahmet Baıtursynulynyń urpaǵy Aıman Baısalqyzymen kezdesý ótkizdi.
Kezdesý aldynda qurmetti qonaq Aıman Baısalqyzy men «Adyrna» ulttyq-etnografııalyq birlestiginiń qyzmetkerleri kolledjdiń stýdentteri jasaǵan qolóner buıymdar jáne qazaqtyń ulttyq aspaptar kórmesimen tanysty.
Kezdesýge fılologııa ǵylymdarynyń kandıdaty, A.Baıtursynulynyń ádebı murasyn zertteýshi Aısulý Oısylbaı hanym men mádenıettanýshy Berdaly Ospan myrza qatysty.
Júzdesý talantty kolledj stýdentiniń dombyrada oınaǵan kúıimen bastaldy. Aıman hanym óz sózin: “Ahmet Baıtursynulynyń urpaǵy retinde qurmettep osynda shaqyrǵandaryńyzǵa kóp raqmet. Men 1936-jyly týylyp bir jyldan soń atam Ahmet Baıtursynuly atylyp ketti, esimdi bilgeli anam Sholpan ár aımaqta, bir jerge turaqtamaı kóship júrdik”, — dep bastady. Atasy Ahmet Baıtursynulynyń ózin kishkentaı kezde moınyna mingizip, talaı erkeletip oınatqanyn aıtyp jáne basqa da kóptegen jan tebirenterlik estelikterimen bólisti. Sóziniń sońynda atasynyń halyq arasynda búginge deıin umytylmaı aıtylyp júrgen «Aqqum» ánin oryndap kózine jas aldy. Jasy 83-tegi syıly qonaqtyń júrekjardy ánin tyńdaǵan jurtshylyq rızashylyqpen uzaq qol shapalaqtady.
Óz kezeginde Aısulý Oısylbaı hanym A. Baıtursynulynyń týǵan eli úshin sińirgen eńbekteri men rýhanı erlikterin jipke tizgendeı áńgimelep berdi.
Berdaly Ospan myrza sol jyldardaǵy alash ardaqtylary, qazaq eliniń táýelsizdigin armandaı otyryp, aldaǵy 100-200 jylǵa jospar quryp, bolashaq úshin eńbek etip ketkendigin tilge tıek etti. A.Baıtursynuly týraly áńgimesinde uly tulǵanynyń qazaq eline aty belgili ul-qyzdaryna tikeleı kómekteskeni týraly qyzyqty oqıǵalardy baıandady. Ahmet Baıtursynulynyń búgingi elimizdiń táýelsizdik alýyna úlken úles qosqanynda atap aıtty.
Sahnaǵa shyqqan tarıh pániniń ustazy Aıjamal Orynáli Aıman Baısalqyzyna sol jerde arnap shyǵarǵan óleńin oqydy. Qonaqtar taǵyda qoshemetke bólendi. Kezdesý barysynda kolledj stýdentteri Ahmet Baıtursynulynyń óleńderin oqyp, án shyrqap, jyr arnady. Kesh sońynda oqý ornynyń ujymy qazaqtyń uly da ór tulǵasy Ahmet Baıtursynulynyń nemeresi Aıman Baısalqyzymen qımaı qoshtasty.
«Adyrna» ulttyq portaly
