Batys Qazaqstan oblysynyń Bókeıorda aýdanynyń Saıhyn eldi-mekeniniń S.Babajanov atyndaǵy mektebinde jastardy áleýmettik damytý jobasy boıynsha semınar-trenıng ótti. Ishki saıasat bólimi, jastar resýrstyq ortalyǵy, aýdandyq bilim berý bóliminiń mamandary, mektep jáne kolledj ustazdary, jalpy 30-dan astam adam qatysty.
Ataýly shara ótken mekteptiń ustazdary jobaǵa óte qatty qyzyǵýshylyq tanytyp, balalaryn 6 baǵyt boıynsha ótetin baıqaýǵa qatystyrýǵa ýáde etti.
Bókeıorda aýdany oblystyń eń shalǵaı jatqan aýdandarynyń biri. Degenmen, Batys Qazaqstan oblystyq ákimshiligi osy aýdanǵa tike baratyn sapaly kúre jol salyp jatqany bir qýantyp tastady. Óıtkeni jaýyn-shashynda shalǵaı aýdandardyń bir-birimen qatynaýy qıynǵa soǵady eken.
Semınar-trenıng barysynda jobanyń maqsaty, nysanasy, júzege asyrylý tásilderi týraly dáris tyńdaǵan qatysýshylarǵa arnaıy sertıfıkattar tabys etildi. Aýdandyq bilim berý bóliminiń tárbıe isi boıynsha ádiskeri Aısaǵalıeva Janargúl Serdegalıevna Bókeıorda aýdany boıynsha jobany júzege asyrýǵa jaýapty maman bolyp bekitildi.
Bul joba "Adyrna" ulttyq-etnografııalyq birlestiginiń uıymdastyrýymen QR Qoǵamdyq damý mınıstrligi men "Azamattyq bastamalardy qoldaý ortalyǵynyń" qoldaýymen júzege asyrylyp jatqanyn atap aıtqan jón.
Arman SERIKULY,
"Adyrna" ulttyq-etnografııalyq birlestiginiń dırektory
