Aqyn Muhamedjan Tazabek Instagram-daǵy paraqshasynda Qaırat Satybaldynyń soty týraly pikir bildirdi, dep habarlaıdy “Adyrna” ulttyq portaly.
“Kinási bolsa moıyndaý – erkektiń tirligi! Tergeý aqyryna jetkenshe myń túrli varıant, júz túrli versııa aıtyldy. Álemdik terrordan áıeldik ósekke deıin túk qaldyrmaı qamtyp, halyqqa «aqparat» tarattyq... «Qańtarǵa» qatysy bardaı, tóńkeris qalaǵan jandaı aıyptadyq. Qara nıetpen qaralaǵandar da, tańdaıy túskenshe tabalaǵandar da boldy. Allaǵa tapsyrdyq! Adamnyń taǵdyry Allanyń qolynda. Alla qalaǵan qulyn synaıdy, qalaǵan qulyn tazartady. Bizge jaman kóringen nársede jaqsylyq, jaqsy kóringen nársede jamandyq bolýy múmkin. Kebin kıgen kelmeıdi, kebenek kıgen keledi...”,- dep jazdy ol.
Odan bólek, saqalǵa qatysty biraz sóz qozǵaı ketip, aǵasy Qaıratqa sáttilik tiledi.
«Aǵamyzǵa Alla jar bolsyn! Synaqtyń jeńildigin bersin. Eń alǵash bizdi qasıetti Mekkege alyp barǵan «qajymaıtyn qara nar» ǵoı bul kisi. Sol jasaǵan jaqsylyǵyńyz úshin tura berińiz qasqaıyp, Qaırat aǵa!!!» - dep ystyq lebizin bildirdi.
“Adyrna” ulttyq portaly
