Ánshi Nurlan Alban óziniń instagram paraqshasynda qandastarymyzdyń el azamattyǵyn alýǵa qatysty ótkir máselesin kóterdi, dep jazady "Adyrna" ulttyq portaly.
- Bizdiń qolymyzdaǵy úlken qarý - áleýmettik jeli. Osy áleýmettik jelide sońǵy ýaqytta toqtaýsyz talqyǵa túsip jatqan másele - shetelden keletin qandastarǵa bes jylsyz azamattyq bermeý týraly zań. Onyń qabyldanýyna el jurt narazylyq bildirip jatyr.... Shetelden keletin kim? Qandas. Qandas degen kim? Qazaq. Ózimiz at tóbelindeı ǵana elmiz... Elimizde ósip-ónemiz dep jatqanda, nege shetelden keletin bizdiń qazaq baýyrlarymyz bes jyl azamattyq ala almaýy kerek? Onyń ornyna kúni keshe shetelden kelip jatqan ózge ult ókilderi azamattyq alyp jatyr. Bul adamdy bólip-jarý ma?- dedi ánshi.
Sonymen qatar, ánshi óziniń vıdeo-úndeýinde bul problemaǵa jaýapty mekemelerdi tizip, túıinniń kóp uzamaı sheshiletinine senim bildirdi. Óziniń azamattyq ustanymyn tanytty.
- Men tolyqqandy QR azamaty retinde sheshilmeı jatqan túıindi bir qalypqa salyp, ádemilep sheship beredi dep depýtattarǵa, elimizdiń prezıdentine, mınıstrlikke joldaımyn. Men shetelden keletin qandastarymyzǵa bes jylsyz azamattyq bermeý týraly zań qabyldaýǵa qarsy ekenimdi bildirgim keledi! - dep túıindedi ánshi óz oıyn.
"Adyrna" ulttyq portaly
