Túrkistan oblysynda Báıdibek aýdanynyń sharýasy qoshqaryn 40 myń dollarǵa, ıaǵnı shamamen 19 mıllıon teńgege satqan. Bul týraly Otyrar.kz basylymy jarııalady, dep habarlaıdy “Adyrna” ulttyq portaly.
Málimet boıynsha, sharýa Amanýlla Aıtahanovtyń ózi oblys ákimi Darhan Satybaldynyń aldynda tıimdi mámile týraly maqtanǵan. Aımaq basshysy Báıdibek aýdanyna jumys saparymen kelip, jergilikti turǵyndarmen, atap aıtqanda, kásipkerlermen, qoı ósirýshilermen kezdesti.
Amanýllanyń aıtýynsha, bul tuqymnyń dene bitimi úlken, ósimi joǵary, quıryǵy qalyń. Jaǵdaıǵa tózimdiliginiń, shydamdylyǵynyń arqasynda gısar qoshqary páter baǵasyna satylǵan.
«Kásipkerlikti damytýǵa grant berdi. Iá, bir qoshqardy 40 myń dollarǵa sattym. Ony Saryaǵashtan aldyq. Qoshqardyń salmaǵy 200 kelideı. Basqa qoshqarlar da bar, olar úshin kem degende 20 myń dollar suraımyn» deıdi fermer.
”Adyrna” ulttyq portaly
