Toqaev şet memleketterdıŋ basşylaryna alǧys bıldırdı
Prezident Qasym-Jomart Toqaev Qazaqstandaǧy Qūryltai deputattarynyŋ alǧaşqy bır palataly sailauynyŋ ötuıne bailanysty jyly lebızın bıldırgen şet memleketterdıŋ basşylaryna rizaşylyǧyn jetkızdı. Būl turaly Aqorda jazdy, dep habarlaidy "Adyrna".
Memleket basşysy Resei Prezidentı Vladimir Putinge, Qyrǧyzstan Prezidentı Sadyr Japarovqa, Äzerbaijan Prezidentı İlham Älievke, Özbekstan Prezidentı Şavkat Mirziioevke jäne Täjıkstan Prezidentı Emomali Rahmonǧa alǧys aitty.
Toqaevtyŋ pıkırınşe, ötken parlamenttık sailau Qazaqstan azamattarynyŋ bırlıgın körsetıp, halyqtyŋ, äsırese jastardyŋ eldıŋ bolaşaǧyna jauapkerşılıkpen qaraitynyn aŋǧartty. Prezident būl üderıstı otanşyldyqtyŋ körınısı retınde baǧalady.
Memleket basşysy Qazaqstandaǧy saiasi jäne ekonomikalyq reformalar men jan-jaqty jaŋǧyru jūmystary tūraqty türde jalǧasyp kele jatqanyn atap öttı. Onyŋ aituynşa, Qūryltai sailauynyŋ nätijelerı azamattardyŋ basym bölıgı eldıŋ qazırgı damu baǧytyn qoldaitynyn körsettı.
Prezident būl jaǧdai Ädılettı, Ozyq jäne Taza Qazaqstan qūruǧa baǧyttalǧan josparlardy jüzege asyruǧa berık negız bolatynyn aitty.
Sonymen qatar Qasym-Jomart Toqaev dostas memleketterdıŋ basşylaryna öz elderınıŋ tūraqty damuyna baǧyttalǧan jobalary men baǧdarlamalaryn tabysty jüzege asyruǧa tılektestık bıldırdı.
Būdan bölek, Memleket basşysynyŋ atyna ŞYŪ, TMD, ŪQŞŪ, EAEK, EYŪ, TÜRKSOI jäne basqa da halyqaralyq ūiymdardyŋ basşylarynan qūttyqtau hattary kelgen.
Eske salaiyq, Qūryltai deputattarynyŋ sailauy 23 tamyzda saǧat 07:00-den 20:00-ge deiın öttı. Ortalyq sailau komissiiasynyŋ aldyn ala mälımetınşe, sailauşylardyŋ qatysu körsetkışı 74,19 paiyzdy qūrady. Dauys bergen azamattardyŋ jalpy sany – 9 352 151 adam.
