Senatorlar bir kúndik jalaqyny Qostanaı oblysynda órtten zardap shekkenderge aýdarady. Bul týraly senat tórǵasy Máýlen Áshimbaev málimdedi, dep habarlaıdy «Adyrna» tilshisi.
«Memleket basshysynyń tapsyrmasymen apatty aýyzdyqtaý úshin arnaıy jedel shtab qurylǵany belgili. Úkimetke tótenshe jaǵdaı saldaryn joıý úshin qajetti qarajat bólý jáne baspanalarynan aıyrylǵan azamattarǵa arnap jańa turǵyn úıler salý jumysyn jedel bastaý jóninde tapsyrma berildi. Apatpen kúres jumystaryna parlament senaty da óz úlesin qosady. Qostanaı oblysynan saılanǵan senatorlar jedel shtabtyń jumysyna atsalysýda. Sondaı-aq senat depýtattary zardap shekkenderge kómek retinde bir kúndik jalaqylaryn aýdarady»,— dedi ol.
