Oqý-aǵartý mınıstri Ashat Aımaǵambetov qazaqstandyqtardy Bilim kúnimen quttyqtady, dep habarlaıdy «Adyrna» tilshisi.
«Qurmetti áriptester, oqýshylar jáne ata-analar!
Sizderdi 1 qyrkúıek – jańa oqý jylynyń bastalýymen quttyqtaımyn! Bul - erekshe emoııalardy týdyratyn mereke, óıtkeni bárimiz de oqýshy boldyq jáne osy kúni umytylmas mektep jyldaryn eske alamyz. Bul - búkil urpaqty biriktiretin mereke.
Bul kún, ásirese birinshi synyp oqýshylary, olardyń analary men ákeleri, ata-ájeleri úshin kóńil tolqytar sáttiń biri bolady. Bıyl 400 myńǵa jýyq bala 1-synypqa barady. Olar alǵashqy álippelerin qolyna alyp, bilim álemine qadam basady.
Bul - mektep bitirýshi 170 myń túlek úshin de aıryqsha kún. Óıtkeni túlekter qorytyndy emtıhandarǵa, ýnıversıtetterge túsýge jáne ómirdegi jańa kezeńniń bastalýyna daıyndalady.
Ol yńǵaıly bolýy úshin byltyrdan beri UBT tapsyrý rásimine birneshe artyqshylyq engizildi. Iaǵnı bul - UBT-ny 4 ret tapsyrýǵa jáne grantqa túsýge 2 múmkindik.
7,6 myń mektepte 3,7 mln balany qajyrly eńbegi men joǵary kásibı sheberligi arqasynda alǵysqa bólenip kele jatqan ustazdarymyz oqytady.
Qazaqstandyq mektepterde, kolledjderde, balabaqshalarda jáne basqa da bilim berý uıymdarynda úzdik muǵalimder jumys isteıdi. Olar - óz isine berilgen jáne shákirtteriniń qabiletterin asha biletin kásibı mamandar. Oqýshylarymyzdyń halyqaralyq olımpıadalardaǵy jeńisteri, kolledj stýdentteriniń Workdskills chempıonattaryndaǵy jetistikteri jáne balalarymyzdyń basqa da jetistikteri sonyń dáleli.
Memleket basshysy Qasym-Jomart Toqaev pedagogter men oqýshylardy qoldaýǵa erekshe kóńil bólip otyr. 2023 jylǵy qańtardan bastap pedagogterdiń, balabaqsha tárbıeshileriniń jáne basqa da bilim salasy qyzmetkerleriniń jalaqysy taǵy da 25%-ǵa ósedi.
Halyqaralyq pándik olımpıadalarda júldeli oryndarǵa ıe bolǵan daryndy balalarǵa 4,7 mln teńgege deıin syıaqy tólenedi. Mundaı olımpıadalar tizimi taǵy 7 zııatkerlik saıyspen tolyǵady. Olarǵa JOO-da oqýǵa granttar da beriledi. Ustazdar da birjolǵy tólem alady.
Úlgerimi tómen balalarǵa erekshe qoldaý, jyly sózder jáne olardyń jetistikke jetetinine senim qajet ekenin túsiný mańyzdy. Sol sebepti bıyl Prezıdenttiń qoldaýymen oqýshylardyń «BIL», «Daryn» sııaqty mektepterde bilim alýy úshin 15% kvota engizdik. Onymen qosa birqatar arnaıy baǵdarlamany qolǵa aldyq.
Erekshe qajettilikteri bar balalar ózderin barynsha jaıly sezinip, mektepterde oqı alýy úshin pedagog-assıstentter sanyn kóbeıtip jatyrmyz. Bul osy baǵyttaǵy keshendi jumystardyń bir bóligi ǵana.
Áriptesterim osy máselede meni qoldap, meıirimdilikke, jylýlyqqa, qoldaýǵa jáne ózine degen senimge muqtaj jandarǵa túsinistikpen qaraıtynyna senemin.
Balalarǵa tabysty oqý jyly men zor densaýlyq, jańa bilimge, jeńister men jańalyqtar ashýǵa kúsh-jiger tileımin!
Áriptesterime shyǵarmashylyq tabys, eńbekqor jáne yntaly oqýshylar, amandyq pen tabys tileımin!
Barshańyzǵa Bilim kúni qutty bolsyn!»—dedi ol.
