Jambyl oblysynda öŋdeu önerkäsıbın jäne otandyq maşina jasau salasyn damytuǧa baǧyttalǧan strategiialyq maŋyzy zor ekı joba bastau aldy. Öŋırde qant zauyty men auyl şaruaşylyǧy tehnikasyn şyǧaratyn zauyttyŋ qūrylysy qolǧa alyndy.
Būl bastamalar şarualardy zamanaui tehnikamen qamtyp, auyl şaruaşylyǧy önımderın tereŋ öŋdeuge jol aşady. Mūndai qadamdar Memleket basşysy Qasym-Jomart Toqaevtyŋ Qazaqstan halqyna Joldauynda aiqyndaǧan strategiialyq mındettermen tolyq säikes keledı.
Baizaq audanynda Qazaqstan täuelsızdık alǧannan berı alǧaş ret qant zauytynyŋ qūrylysy bastaldy. Jobanyŋ investisiialyq kölemı şamamen 200 mln AQŞ dollaryn qūraidy. Käsıporyn jylyna 1 million tonna qant qyzylşasyn qaita öŋdep, 120 myŋ tonnaǧa juyq qant öndıruge qauqarly bolady. Sonymen qatar melassa men jom siiaqty qosalqy önımder de şyǧarylady. Zauytta 350-den astam tūraqty jūmys orny aşylady.
Būl künı Taraz qalasyndaǧy industriialyq aimaqta auyl şaruaşylyǧy tehnikasyn öndıretın käsıporynnyŋ qūrylysy bastaldy. Jobanyŋ jalpy qūny – 10 mlrd teŋge. Zauyt ıske qosylǧannan keiın jylyna 2 myŋǧa deiın san türlı traktorlar men tırkemelı jabdyqtar şyǧaratyn bolady. Mūnda 55 jaŋa jūmys orny qūrylady.
Biylǧy jyldyŋ segız aiynda oblystyŋ negızgı kapitalyna tartylǧan investisiia kölemı 391,7 mlrd teŋgenı qūrap, ötken jyldyŋ osy kezeŋımen salystyrǧanda 32,4 paiyzǧa artty.
Memleket basşysynyŋ Qytaiǧa sapary barysynda jel generatorlaryna arnalǧan qosalqy bölşekter şyǧaratyn zauyttyŋ alǧaşqy keşenı ıske qosyldy. Al qaraşa aiynda jylyna 800 myŋ tonna önım beretın kükırt qyşqyly zauytynyŋ bırınşı kezeŋı paidalanuǧa berıledı dep josparlanǧan. Būdan bölek, öŋırde jügerını tereŋ öŋdeu zauyty, metallurgiialyq keşen jäne kalsiilengen soda öndıretın käsıporynnyŋ qūrylysy jürıp jatyr. Tek osy bes ırı jobanyŋ jalpy investisiialyq kölemı 1,5 trln teŋgeden asyp otyr.
– Bız el Prezidentınıŋ tapsyrmalary söz jüzınde emes, naqty ıster arqyly oryndalyp jatqanyn aiqyn körıp otyrmyz. Jambyl oblysy önerkäsıp pen öŋdeu salasynda qolǧa alynǧan ırı bastamalardyŋ jüzege asatyn basty ortalyqtarynyŋ bırıne ainalyp keledı, – dedı Erbol Qaraşökeev.
Ūqsas jaŋalyqtar
